Qanysh Sátbaevtyń murasyn júıelep, jańa ǵylymı aınalymǵa engizý jolynda M.Áýezov atyndaǵy Ádebıet jáne óner ınstıtýtynyń ǵalymdary daıyndaǵan bul eńbek – akademııalyq deńgeıdegi mazmundy, salmaqty jınaq. Onda ǵalymnyń geologııa-mıneralogııa salalaryndaǵy zertteýlerimen qatar, pýblısıstıkalyq jáne ǵylymı maqalalary, sırek kezdesetin sýretteri men muraǵattyq qujattary toptastyrylǵan.
Tusaýkeserge elimizdiń ǵylym, bilim, mádenıet salasynyń tanymal ókilderi, ǵalymdar men zertteýshiler, qoǵam qaıratkerleri jáne BAQ ókilderi qatysty. Sharany M.O. Áýezov atyndaǵy Ádebıet jáne óner ınstıtýtynyń bas dırektory, akademık Kenjehan Matyjanov júrgizdi. Kenjehan Islámjanuly «Ulttyq rýhty órletken uly tulǵa» atty kirispe sózinde Qanysh Sátbaevtyń ulttyq rýhty bıiktetken tulǵalyq bolmysyna keńinen toqtalyp, ǵalymnyń qazaq ádebıetine, ádebıettaný ǵylymyna qosqan úlesi týraly jan-jaqty baıandady. Sonymen birge akademııalyq jınaqtyń ereksheligi men ǵylym úshin mańyzyn atap ótti. Saltanatty jıynda birqatar mazmundy baıandamalar oqylyp, Q.Sátbaevtyń san qyrly eńbegi jan-jaqty talqylandy.
Atap aıtqanda, «Qanysh – qazaq rýhanııatynyń qamqorshysy» – Parlament Senatynyń depýtaty, hımııa ǵylymdarynyń doktory, professor, QR UǴA akademıgi, «Q.I.Sátbaev halyqaralyq qory» qoǵamdyq qorynyń qamqorshylyq keńesiniń tóraǵasy Altynbek Nuhuly, «Ustaz ulaǵaty» – ǵalym, tehnıka ǵylymdarynyń doktory, UǴA akademıgi Sultanbek Qojahmetov, «Qanysh Imantaıulynyń geologııa salasyna qosqan úlesi» – memleket jáne qoǵam qaıratkeri, UǴA akademıgi, geologııa-mıneralogııa ǵylymdarynyń doktory Serikbek Dáýkeev, «Injenerlik oı-sana jáne ulttyq rýh» – Qazaqstannyń Eńbek sińirgen qaıratkeri, Ulttyq jaratylystaný ǵylymdary akademııasynyń akademıgi, fılosofııa ǵylymdarynyń doktory, professor Sydyqov Ulyqpan, «Qanysh Sátbaev jáne ulttyq sananyń jańǵyrýy» – geologııa-mıneralogııa ǵylymdarynyń doktory, professor Ádilhan Baıbatsha, «Qanysh Sátbaev planetasy» – QR Eńbek sińirgen qaıratkeri, fılologııa ǵylymdarynyń doktory, professor Serik Negımov, «Qanysh Sátbaev jáne qazaqtyń mýzykalyq murasy» – QR Eńbek sińirgen qaıratkeri, mýzykatanýshy, dástúrli ánshi Erkin Shúkiman baıandama jasady. Qanysh Imantaıulynyń qazaq ǵylymy men ult rýhanııatyn órkendetýdegi eren eńbegine toqtalyp, ǵalym jınastyrǵan birneshe ándi oryndady.
Sharanyń kelesi bóliminde «Ǵylym ordasy» RMK bas dırektory Ular Muqajanov, belgili kompozıtor, pýblısıst, qoǵam qaıratkeri Erýlan Kanapıanov, Qanysh Imantaıulynyń týǵan jerinen arnaıy kelgen «Akademık K.I.Sátbaevtyń Baıanaýyl memorıaldyq mýzeıiniń» basshysy Qaıyrgeldi Ábilǵazın quttyqtaý sóz sóılep, bes tomdyq jınaqtyń jaryqqa shyǵýy – el rýhanııaty úshin úlken olja ekenine nazar aýdardy. Konferensııada “Qazaqstan ǵylymynyń tarıhy” mýzeıi jáne Ortalyq Ǵylymı kitaphananyń uıymdastyrýymen Qanysh Sátbaev ómiri men shyǵarmashylyǵyna arnalǵan kórme kórsetildi.
Shara aıasynda Senat depýtaty, akademık Altynbek Nuhuly Qanysh Sátbaevtyń ǵylymı murasyn zerdeleýge eleýli úles qosqan M.O. Áýezov atyndaǵy Ádebıet jáne óner ınstıtýtynyń dırektory Kenjehan Islámjanulyna, akademık Sultanbek Myrzahmetulyna, fılosof-ǵalym Ulyqpan Esilhanulyna jáne geologııa ǵylymdarynyń doktory Ádilhan Bekdildaulyna «Qanysh Sátbaev medalin» saltanatty túrde tabystady.
Jaryqqa shyǵyp otyrǵan akademııalyq jınaqty daıyndaý barysynda ǵalymdar tarapynan tekstologııalyq zertteýlerge aıryqsha mán berilgen. Ǵalymnyń buryn jaryq kórgen eńbekteri alǵashqy nusqalarymen salystyrylyp, túrli basylymdarda ketken aýytqýlar men burmalanǵan tustar muqııat saralanyp, qalpyna keltirildi. Bul jınaqta Qanysh Sátbaevtyń ǵylymı stıli, avtorlyq baıandaýy men tili barynsha saqtalyp, usynylǵan.
Nur Maǵazbek,
M.Áýezov atyndaǵy Ádebıet jáne óner
ınstıtýtynyń qyzmetkeri
