Foto: Oqý-aǵartý mınıstrligi
Oqý-aǵartý mınıstrliginiń habarlaýynsha, jańa júıe Certiport halyqaralyq platformasy negizinde iske qosylyp, qazirgi tańda eldiń bes kolledjinde pılottyq rejımde júzege asyrylyp jatyr. Alǵashqy resmı testileý ortalyǵy «Talap» kommersııalyq emes aksıonerlik qoǵamy bazasynda ashylǵan.
Aıta keteıik, Certiport – Ulybrıtanııalyq Pearson kompanııasynyń quramyna kiretin, keńse baǵdarlamalary men sıfrlyq tehnologııalar salasynda sertıfıkat beretin álemge tanymal platforma. Atalǵan sertıfıkattar 150-den astam elde moıyndalyp, stýdentterge shetelde taǵylymdamadan ótýge, jumysqa ornalasýǵa jáne jahandyq eńbek naryǵyna shyǵýǵa jol ashady.
«Qazirgi tańda kolledj túlekterine tek dıplom emes, naqty daǵdylaryn rastaýy da qajet bolýda. Halyqaralyq sertıfıkattaý olarǵa Qazaqstanda da, shetelde de jańa mansaptyq múmkindikter ashady», dedi QR Oqý-aǵartý mınıstrliginiń tehnıkalyq jáne kásiptik bilim berý departamentiniń dırektory Áset Muhanbetov.
Alǵashqy emtıhan sessııasy ASTANA POLYTECHNIC joǵarǵy kolledjiniń bazasynda ótken. Testileý nátıjesinde tórt stýdent óz biliktiligin sátti dáleldep, halyqaralyq sertıfıkattarǵa ıe bolǵan. Atap aıtsaq, Dmıtrıı Karpıýk – kıberqaýipsizdik mamany, Arsenıı Syplakov – kıberqaýipsizdik mamany, Rashıd Hısmatýllın – kıberqaýipsizdik mamany jáne Ádemi Qabdolla – JavaScript baǵytyndaǵy IT-maman.
