Forýmnyń basty uıymdastyrýshylary – О́zbekstan Respýblıkasynyń Jastar isi agenttigi jáne Mádenıet mınıstrligi janyndaǵy Ultaralyq qatynastar jáne sheteldik eldermen dostyq baılanystar komıteti. Jıyn aıasynda Túrkııa, Ázerbaıjan, Qazaqstan, Qyrǵyzstan, Túrikmenstan, Vengrııa, Fransııa jáne Germanııada turatyn túrki dıasporasynyń jas kóshbasshylary bas qosyp, ózara tájirıbe almasty.
Forýmnyń 17 maýsym kúni ótken basty is-sharalarynyń biri – «Shekarasyz mura: bolashaqty qalyptastyratyn dıasporanyń jas kóshbasshylary» atty paneldik pikirtalas sessııasy boldy. Sessııa Hilton Tashkent City qonaqúıinde ótti.
Moderatorlyq etken О́zbekstan Respýblıkasynyń Ultaralyq qatynastar jáne sheteldegi otandastarmen baılanys jónindegi komıteti departamentiniń basshysy Alımardonov Otabek forýmdy ashyp berdi.
Sessııada Qazaqstan atynan «Otandastar qory» KeAQ ókili Aljan Sharıpov sóz sóıledi. Ol óz baıandamasynda: «О́zbekstanda 1 mıllıonnan asa qazaq turady, al Qazaqstanda 600 myńnan astam ózbek ulty turady. Olar eki eldi baılanystyrýshy altyn kópir. Elderimizdiń Túrki memleketteri uıymy men Orta Azııa sheńberinde birlesip jumys isteýi mańyzdy. Delegat retinde men TMU jas sarapshylar mektebin qurýdy usynamyn. Túrli saladaǵy jas ekspertter jańa ıdeıalar men utymdy sheshimder usyný arqyly memleketaralyq baılanystyń odan ári damýyna sebepker bolatynyna senimdimin», dedi.
Sonymen qatar sessııa barysynda Túrki áleminiń túrli elderinen kelgen jas kóshbasshylar óz elderiniń tájirıbesimen bólisip, dıaspora jumysynyń ózekti máselelerin kóterdi. Atap aıtqanda, Ázerbaıjan, Túrkııa, Qyrǵyzstan, Túrikmenstan jáne Vengrııadan kelgen qatysýshylar óz elderindegi jastar uıymdarynyń jobalary jaıly aqparat berip, jańa seriktestik baǵyttaryn usyndy.
Bul forým – túrkitildes elderdiń jas kóshbasshylary arasynda yntymaqtastyqty nyǵaıtýǵa, ortaq mádenı murany saqtaý men damytý joldaryn birlese qarastyrýǵa baǵyttalǵan mańyzdy platforma boldy. Forým sońynda qatysýshylardyń bastamalary men usynystary negizinde birqatar praktıkalyq sheshimder qabyldanýy josparlanýda.
