Onyń aıtýynsha, Nazarbaev Ýnıversıteti – elimizdiń zııatkerlik áleýetiniń tiregi ári ǵylymı-tehnologııalyq progrestiń flagmany.
«Memleket basshysy Qasym-Jomart Toqaev óziniń Joldaýlarynda bilim men ǵylym el damýynyń strategııalyq negizi ekenin birneshe ret atap ótti. Prezıdent «Biz álemdik standarttarǵa saı keletin ulttyq joǵary bilim berý júıesin qalyptastyrýymyz qajet» dep naqty mindet júktedi», deıdi depýtat.
Osyǵan baılanysty AMANAT partııasy fraksııasy birneshe naqty usynys engizip otyr.
Birinshiden, depýtattyń aıtýynsha, ýnıversıtettiń basshylyq quramyn qazaqstandyq mamandarmen tolyqtyrý mańyzdy. «Vıse-prezıdentter, mektep dekandary men ózge de basqarýshy laýazymdarǵa keminde 70 paıyz deńgeıinde qazaqstandyq azamattardy taǵaıyndaý máselesin qarastyrý qajet. Bul – strategııalyq basymdyqtardy tereń túsinetin ári zamanaýı basqarý tájirıbesin ıgergen ulttyq kadrlar korpýsyn qalyptastyrýǵa jol ashady», – deıdi Juldyz Súleımenova.
Onyń aıtýynsha, búginde «Bolashaq» baǵdarlamasy arqyly shetelde bilim alǵan, ǵylymı dárejeleri bar jas mamandar elimizde bar.
«Olarǵa joǵary jaýapkershilik júkteletin laýazymdar usyný – olardyń shetelge ketýiniń aldyn alyp, elimizdiń ǵylymy men bilim berý salasyna qyzmet etýine múmkindik beredi», deıdi depýtat.
Ekinshiden, Súleımenovanyń aıtýynsha, Nazarbaev Ýnıversıtetiniń Joǵary bilim mektebi aıasynda pedagogıkalyq menedjment boıynsha jańa bilim berý baǵdarlamalaryn engizý qajet.
«Mektep dırektorlary, olardyń orynbasarlary men tárbıe isine jaýapty mamandarǵa arnalǵan arnaıy bakalavrıat baǵdarlamasy ázirlenip, oǵan memlekettik bilim granttary bólinse, bul bilim berý salasyn basqarýǵa qabiletti mamandar daıarlaýǵa yqpal eter edi», deıdi ol.
Úshinshiden, depýtat aýyl mektepteriniń túlekterine arnalǵan arnaıy daıyndyq baǵdarlamasyn engizýdi usynady. Onyń aıtýynsha, qazirgi tańda Nazarbaev Ýnıversıtetiniń Foundation baǵdarlamasyna negizinen qalalyq jáne ınnovasııalyq mektep túlekteri ǵana túsip júr.
«Aýyl túlekteri úshin bul baǵdarlama bilim deńgeıi men ortadaǵy aıyrmashylyqtar saldarynan qoljetimsiz. Sondyqtan 1,5 jyldyq arnaıy daıyndyq baǵdarlamasyn ázirleý qajet. Bul — óńirlik teńsizdikti azaıtyp, daryndy jastardyń áleýetin ashatyn, Memleket basshysy atap ótken áleýmettik ádilettilik qaǵıdatyn iske asyratyn mańyzdy qadam», deıdi Juldyz Súleımenova.
