«Toǵyzbulaq ýchaskesindegi obalardyń birazy tonalǵan, keıbiri apatty jaǵdaıda tur. Soǵan qaramastan zertteýshiler Toǵyzbulaq-1 jáne Toǵyzbulaq-2 qorymyndaǵy 6 obany ashyp, saraptama jasady. Toǵyzbulaq-1 qorymynda 20-dan astam oba anyqtalsa, onyń 10-y alystan tizbektelip men mundalaıdy. Solardyń arasynan aıryqsha kózge túsken tórt oba ashyldy. Birinshisinen jas balanyń súıegi tabylsa, ekinshisinen shashylǵan súıek qaldyqtary ilindi. Al úshinshi jáne tórtinshi obada ǵalymdar kútpegen oljaǵa keneldi. Dál osy obalardan qysh ydystar men kıimge, beldikke arnaıy jasalǵan altyn qapsyrmalar men altyn júzik tabyldy. Bul jádigerler bizdiń zamanymyzdan burynǵy IV-III ǵasyrlarda ómir súrgen saq taıpalaryna tıesili. Jáne sol zamandaǵy jergilikti halyqtyń órkenıetinen habardar etedi, jádigerlerdiń kópshiligi ań stılinde jasalǵan. Altyn qapsyrmalar qazaqtyń qoshqar múıizi, tamshy tárizdi formada jasalǵan», deıdi ál-Farabı atyndaǵy QazUÝ Tarıh fakýltetiniń dekany, tarıh ǵylymdarynyń doktory, professor Dosbol Baıqonaqov.
Qorymnan tabylǵan 30 shaqty jádigerdiń eń qundysy jáne syzat túspeı aman saqtalǵany – altyn júzik. Onyń salmaǵy – 8 gramm, onda arystan beınesi bederlengen. Professor Dosbol Súleımenuly osyǵan uqsas júzik Esik qalasynan tabylǵan «Altyn adamda» bolǵanyn alǵa tartty. Júziktegi arystan beınesi dınastııalyq bılikti bildiretindikten, bul obalarda jaı adamnyń múrdesi jatpaǵanyn aıtady.
Bul baǵa jetpes jádigerler ólke tarıhyn baıytýǵa orasan zor septigin tıgizeri sózsiz.
«Altyn áshekeılerdiń tabylýy – saq dáýirindegi zergerlik ónerdiń bıik deńgeıin, zergerlerdiń asqan sheberligin kórsetedi» deıdi Almaty oblystyq mádenıet, arhıvter jáne qujattama basqarmasynyń basshysy Danııar Álıev.
Qazba jumysy barysynda tabylǵan jádigerler aldaǵy ýaqytta arnaıy zerthanaǵa jiberilip, tarıhı qundylyǵy anyqtalady.
Almaty oblysy
