Hakimge arnalǵan velosherý

Velosherýdiń ashylý saltanatynda gımnazııa oqýshylary Ál-Farabı Ilııash, Aıbota Sııa aqyn óleńderin oqyp, qaty­sýshylarǵa jiger men shabyt syılady. Qalalyq bilim bó­liminiń basshysy Esentaı Áshim velosherýdiń ashylýymen qut­tyqtap, velomarafonnyń mańy­zyna toqtaldy.

– Uly Abaıdyń 180 jyldyq mereıtoıynda oraı uıym­das­ty­rylyp otyrǵan ıgi istiń Abaı esimin ıelengen mektepten bas­taý alyp jatqany qýanyshty. Ultymyz úshin, el bolashaǵy úshin Abaıdyń qylǵan qyzmeti, aıtqan oı-tolǵamdary árqashan mańyzdy. Hakim Abaıdyń «Tolyq adam» ilimin qalyptastyrýda mektep ujymy men ata-analar qaýymynyń atqaryp jatqan eńbegi zor, – dedi Esentaı Áshim.

Belgili veloshabandoz, «Tolyq adam jáne tórt damý», «Abaı arqyly aǵylshynsha úıren» jobalarynyń avtory Ernat Rahmetolla velosporttyń adamǵa tıgizer paıdasymen bólisti.

– Velobeketteri bar, ınfra­qury­lymy damyǵan Almaty, Astana qalalaryn tolyqtaı veloqala dep ataýǵa bolady. Bizdiń basty maqsatymyz – qazynaly Qaraǵandy qalasyn da sol deńgeıge jetkizip, jańa múmkindikterge ıe bolý. Osy ýaqytqa deıin biraz velosherý uıymdastyrdyq. Abaı atamyzǵa arnalǵan velosherýdi aldaǵy ýaqytta budan da aýqymdy túrde, shyǵys elinde, aqynnyń týǵan jerinde dúbirletip ótkizýdi kózdep otyrmyz, – deıdi Ernat Melsuly.

Mektep aýlasynan bas­taý alǵan velosherý Abaı eskert­kishi janynda jalǵasyn tapty. Abaıdyń óleńderi men qara sózderi jóninde sóz qozǵaǵan ǵalym, fılologııa ǵylym­da­rynyń doktory Jandos Smaǵulov mundaı salamatty ómir saltyn nasıhattaıtyn is-shara dástúrge aınalsa degen tilegin bildirdi.

Velosherýge qatysýshylardyń kelesi mejesi ortalyq saıabaq boldy. Olar bastapqy orynnan máre syzyǵyna deıin saıabaq aýmaǵyndaǵy úsh negizgi aıaldamany basyp ótti. Alǵashqy «Aqıqat sózi» aıaldamasynda veloshabandozdar Abaıdyń óleńderin oqydy. Kelesi «Hakim júregi» beketinde aqynnyń ánderi shyrqalsa, sońǵy «Qara sóz keńes» aıaldamasynda Abaı atamyzdyń qara sózderi talqy­lanyp, qatysýshylar ózara pikir almasty.

Sporttyq is-sharanyń má­resine jetken barlyq veloshabandoz arnaıy medaldarmen, qalalyq ishki saıasat bóliminiń Alǵyshatymen marapattaldy. Is-sharanyń ótýine uıytqy bolǵan Abaı atyndaǵy mektep-gımnazııasynyń dırektory Jadyra Sabyrqyzy qatysýshylarǵa erekshe alǵysyn bildirdi. Aldaǵy ýaqytta velo­júırikter Abaı eline barýdy kózdep otyr.

Qaraǵandy oblysy