Foto: Sý resýrstary jáne ırrıgasııa mınıstrligi
Nurjan Nurjigitov Jalaǵash, Qazaly jáne Qarmaqshy aýdandarynyń sharýalarymen kezdesip, olardy tolǵandyrǵan suraqtarǵa jaýap berip, sýdyń «kóleńkeli naryǵyna» qarsy kúres sharalary, sý únemdeý tehnologııalaryn engizýdi sýbsıdııalaý jáne sýarmaly sýdy ádil bólýdi qamtamasyz etý sharalary týraly aıtyp berdi.
Jalaǵash jáne Qarmaqshy aýdandarynyń dıqandary mınıstrlikten qosymsha sorǵylar satyp alýǵa kómek kórsetýdi surady. N.Nurjigitov bul máselede vedomstvo fermerlerge qoldaý kórsetetinin aıtty.
«Byltyr qazan aıynan bastap biz Qyzylorda oblysyna, sonyń ishinde Soltústik Aral men óńirdiń kól júıelerine sý berýdi ulǵaıttyq, alaıda aýa raıy jaǵdaılary men jaýyn-shashynnyń azdyǵyna baılanysty vegetasııalyq kezeń 20 kún buryn bastaldy. Klımattyń ózgerýi Syrdarııa basseıniniń sý resýrstaryna odan ári áser etedi. Sondyqtan sý únemdeý tehnologııalaryn engizýdi jedeldetý, ylǵaldy az qajet etetin daqyldarǵa kóshýdi qarastyrý jáne jalpy sýarmaly sýdy neǵurlym utymdy paıdalaný qajet», dedi mınıstr N.Nurjigitov.
Mınıstr «Qazsýshar» RMK-niń «Syr sýy» fılıalyna jańa arnaıy tehnıkalardyń kiltterin tapsyrý rásimine qatysty. Jalpy alǵanda, fılıal 30 tehnıka aldy, onyń ishinde ekskavator-tıegishter, shynjyr tabandy ekskavatorlar, traktorlar, tirkemeler, sý tasyǵyshtar, samosvaldar, avtokran, tartqysh, aspaly jabdyq, dızeldi generator jáne t.b. bar. Fılıalǵa jalpy sany 35 tehnıka bólindi, endi qalǵan 5 tehnıka bıyl qyrkúıekke deıin jetkiziledi.
Esterińizge salaıyq, qazirgi ýaqytta «Qazsýshar» RMK fılıaldaryn búkil el boıynsha jańa jabdyqtarmen jaraqtandyrý jalǵasyp jatyr. Búginde kásiporyn fılıaldary josparlanǵan 757 arnaıy tehnıka men avtokóliktiń 439-yn aldy.
Aral aýdanynda Nurjan Nurjigitov «Kókaral bógetin saqtaý jáne Syrdarııa ózeniniń atyrabyn qalpyna keltirý» jobasynyń iske asyrylý barysymen tanysty. Búgingi tańda «Tushy», «Sarytereń» jáne «Qarashalan-1» kanaldaryn mehanıkalyq ádispen tazalaý, sondaı-aq «Táýir» qorǵanys bógetin qalpyna keltirý jumystary júrgizildi. Sonymen qatar «Kókaral» jáne «Aqshaýyt» bógetterin qalpyna keltirý jáne nyǵaıtý, sondaı-aq «Qarashalan-2» kanalyn tazartý jalǵasyp otyr. Joǵaryda atalǵan tórt kanalda bas qurylystardyń qurylysy júrgizilip jatyr. 2026 jyldyń sońyna deıin jumysty tolyq aıaqtaý josparda bar.
Iri ekologııalyq joba Aral mańy óńiriniń ekologııalyq tepe-teńdigin qalpyna keltirýge, sý resýrstaryn tıimdi paıdalanýdy arttyrýǵa jáne aımaqtaǵy halyqtyń ómir súrý sapasyn jaqsartýǵa baǵyttalǵan. Sý resýrstary jáne ırrıgasııa mınıstri barlyq josparlanǵan jumystyń sapaly ári merziminde oryndalýyn qamtamasyz etýdi tapsyrdy.
