Medıa salasy qyzmetkerlerine baspana berý bastamasy — azamattardy áleýmettik qoldaýdy kúsheıtý jáne qoǵamdyq turaqtylyqty nyǵaıtýǵa baǵyttalǵan keń aýqymdy memlekettik saıasattyń bir bóligi.
Saltanatty rásim barysynda QR Prezıdentiniń Keńesshisi – Baspasóz hatshysy Rýslan Jeldibaı BAQ qyzmetkerlerin kásibı merekesimen quttyqtady.
«Memleket basshysy Qasym-Jomart Toqaevtyń tapsyrmasymen bıyl úshinshi jyl qatarynan jýrnalısterge páter berý sharasy uıymdastyrylyp otyr. Bul – Prezıdenttiń otandyq medıa qyzmetkerlerine degen úlken qoldaýy. Bıyl páterler tek jýrnalısterge ǵana emes, rejısserlerge, operatorlarǵa, korrektorlarǵa jáne otandyq medıanyń ózge de mamandaryna beriledi. Sonymen qatar biz áleýmettik osal toptarǵa erekshe nazar aýdardyq: páter ıeleriniń qatarynda kópbalaly jáne múmkindigi shekteýli bala tárbıelep otyrǵan otbasylar da bar. Áriptesterimizdiń jetistikterine qýanyshtymyz. Barshańyzdy shyn júrekten quttyqtaımyn!», dedi Rýslan Jeldibaı.
Páter sertıfıkattaryna «Qazaqstan» respýblıkalyq teleradıokorporasııasy, «Habar» Agenttigi» AQ, «Qazcontent» AQ, «Qazaq gazetteri» JShS, «EVRAZIIа+ORT» JShS, «Atameken Business» medıaholdıngi, Tengrinews jáne basqa da medıa uıymdardyń qyzmetkerleri ıe boldy.
«Memleket basshysynyń BAQ ókilderin baspanamen qamtamasyz etý bastamasyn «Dara» qory sátti júzege asyryp keledi. Qoǵamǵa oń áser etetin jáne azamattardyń ál-aýqatyn jaqsartatyn jobalardy iske asyrý – bizdiń negizgi qundylyqtarymyzdyń biri bolyp qala beredi», dep atap ótti «Dara» Prezıdenttik bastamalar qorynyń jetekshisi Muhamedqalı Taýan.
