«Taza Qazaqstan» aksııasy – tek tazalyq jumystary ǵana emes, bul azamattyq qoǵamnyń ekologııalyq mádenıetin qalyptastyrýǵa baǵyttalǵan mańyzdy qadam. Jastar resýrstyq ortalyǵy músheleri osy bastamanyń óńirde keń kólemde ótkizilýine uıytqy bolyp keledi.
« Erte kóktemnen beri turaqty túrde uıymdastyryp jatqan is-sharanyń maqsaty –jastarymyzdyń boıynda ekologııalyq mádenıetti qalyptastyrý. Bul tabıǵatqa janashyrlyqpen qaraý, tóńirekti qoqysqa toltyrmaý, kókti julmaý, aǵashty syndyrmaý sııaqty qarapaıym qaǵıda. Túpki maqsat –ósip kele jatqan urpaq boıynda ekologııalyq sana qalyptastyrý. Jastar osy jaǵynan bir-birinen úlgi alady», deıdi Aqtóbe oblystyq jastar resýrstyq ortalyǵynyń basshysy Samǵat Artyǵalın.
«Tabıǵatty qorǵaý – árbir azamattyń paryzy» dep esepteıtin jastar ekologııalyq aksııa kezinde sý qoımasynyń aınalasyn qoqystan tazartyp, yntymaqtasa jumys atqardy.
«Demalýshylarǵa da qoqystardy ózderimen birge alyp ketýdi eskerttik. Osylaısha tazalyq jumystaryn júrgizip qana qoımaı, adamdardyń ekologııalyq mádenıetin qalyptastyrýǵa da yqpal etip jatyrmyz», deıdi volonter Janseıit Qýandyq.
Aıta ketý kerek, «Taza Qazaqstan» jalpyulttyq jobasy aıasynda bıylǵy jartyjyldyqta Aqtóbe oblysy boıynsha jastar resýrstyq ortalyqtarynyń uıymdastyrýymen 332 ekoaksııa ótkizilip, oǵan 8997 jas qatysty.
Aqtóbe oblysy
