«Jańbyr jaýyp, qar erigende tóbeden tamshylaǵan sý boks zalynyń ishin kólshikke aınaldyrady. Sonyń saldarynan taqtaıdan tóselgen eden shirip, jamaıtyn jer qalmady. Ony ár kez óz qaltamyzdan qarjy shyǵaryp, jóndep kelemiz. О́ńirimizde bolǵan jer silkinisinde ǵımarattyń qabyrǵalaryna zaqym kelip, shytynap ketti. Sport mektebiniń káriz júıesi ortalyqqa qosylmaǵandyqtan, irgedegi septık únemi tolyp, odan shyqqan jaǵymsyz ıis qolqany qaýyp, qysy-jazy tynys alý múmkin emes. Ony sorǵyzý da qaltaǵa salmaq salady. Qaltany qaǵar qarjydan buryn, munda jattyǵatyn balalar men ustazdardyń densaýlyǵyna aıtarlyqtaı zııan tıgizip otyr. Qysta ot jaǵyp, kúl shyǵarýmen aınalysamyz», deıdi №2 balalar men jasóspirimder sport mektebi dırektorynyń oqý isi jónindegi orynbasary Dýlat Túzelbaı.
Irgeden ótetin kógildir gaz qubyryna qosylýǵa ara qashyqtyqtyń sáıkes kelmeýi kesirin tıgizip turǵanyn tilge tıek etken Dýlat Bekjanuly ot jaǵý maýsymynda ǵımaratty jylýmen jetkilikti mólsherde qamtamasyz etýge 21 mln teńgege kómir túsirip, ony 300 metrdegi qoımaǵa tasymaldaý da qıyndyq týdyryp, tıtyqtatyp júrgenin ashyp aıtty.
Shelektegi nysannyń syn kótermeıtin ahýalymen alys-jaqynnan keletin atqaminerler, ákim-qaralar, ár deńgeıdegi depýtattar tegisteı habardar bolǵanymen, aıtylǵan sóz aıtylǵan jerde qalyp jatqany qynjyltady.
Jalpy aýmaǵy 150 sharshy metrlik 2 qabatty memlekettik menshiktegi nysannyń tozyǵy jetkenine qaramastan, 988 oqýshy úzdiksiz jattyǵyp, san alýan sport túrleri boıynsha baıraqty básekelerge qatysyp, kók týymyzdy kókte jelbiretip keledi. Balalar men jasóspirimder erkin kúres, dzıýdo, boks, qazaq kúresi, fýtbol, voleıbol, basketbol, kıkboksıng, grek-rım, áıelder kúresi, saıatshylyq syndy sport túrlerimen jattyǵyp, aıtarlyqtaı jetistikterge jetip júr. Bıyl bokstan Aqerke Dalabaı Azııa chempıony atandy. Injý Baqqoja erkin kúresten Azııa balalar oıynynda 2-oryn, Ispanııada ótken halyqaralyq jarysta 1-oryn, Túrkııada ótken beldesýde 2-oryn alyp, ujymnyń mereıin ósirdi. Mektep túlegi Eleonora Turǵanova bokstan Azııa, álem chempıony atanǵan. Qusbegilik ónerge baýlıtyn maman Aıan Seıitjannyń shákirti Beksultan Seıitjan Úrjarda ótken jarysta álem chempıony atanyp, abyroıyn asqaqtatqan.
Kıkboksıngten álem chempıony, álem kýboginiń ıegeri, Eýropanyń 2 dúrkin chempıony, Azııa chempıony Elmurat Qaıypjanov basqaratyn sport mektebinde shtat sany – 59, onyń ishinde 29-y bapker. Eńbek ujymy qıyndyqqa qaramastan, aýyl balalary men jasóspirimderdi salamatty ómir saltyna, sportqa baýlyp, nátıjeli jumys istep otyr. Sóz túıini, Shelek aýylyndaǵy memleket menshigindegi bul nysanǵa nazar aýdaratyn, kúrdeli jóndeý júrgiziletin ýaqyt jetti.
Almaty oblysy
