Kollajdy jasaǵan – Qonysbaı ShEJIMBAI, «EQ»
B.Qasenov at jalyn tartyp mingennen iskerlik, uıymdastyrýshylyq qabiletterimen tanyldy. Qatardaǵy mamannan bastap úlken ómir, qyzmet baspaldaqtarynan ótti. Aqyl-parasaty men bilim-biligin halyqtyń ıgilikti isterine arnady. Árqıly bastamalar men ıgi isterdiń uıytqysy bolyp, aýyl, aýdan basshylyǵy deńgeıindegi qyzmetterdi abyroıly atqarýmen qatar, qoǵam ómirine belsene aralasyp tájirıbeli basshy, sheber uıymdastyrýshy retinde kórindi. Aýyl sharýashylyǵynyń ósip-órkendeýine qomaqty úles qosty.
Bilikti maman, atpal azamat retinde basshylyq, uıymdastyrýshylyq jumystarǵa tartyldy. Sóıtip, 1978 jyly Jańaarqa aýdany Aqtaý selolyq atqarý komıtetiniń tóraǵasy qyzmetine saılandy. 80-jyldary aýdandyq aýyl sharýashylyǵy bóliminiń bas zootehnıgi, meńgerýshisi bolyp qyzmet atqardy. 1984 jyly qoı ósirýmen aınalysatyn Karl Marks atyndaǵy sovhozǵa dırektor bolyp taǵaıyndaldy. Jigerli basshy jumysqa belsene kirisip, sharýashylyqtyń tórt bólimshesindegi qoı malyn jasyna, salmaǵyna, sapasyna qaraı suryptap, seleksııalyq jumystar júrgizdi. Sovhoz ortalyǵynan 3000 qoı, 50 iri qara mal, 50 bas jylqy bordaqylaıtyn alań salyndy. Sharýashylyqpen birge sport, mádenıet salasynyń damýyna erekshe kóńil bóldi. Aýylǵa kireberistegi 11 shaqyrymdyq avtokólik jolyna asfalt tóseldi. Aýyl ortalyǵyna aǵash kesetin qondyrǵy ornatyp, qalyńdyǵy 30-40 mm quraıtyn taqtaılar daıyndap, qurylysqa paıdalandy. Aýyl turǵyndaryna, shopandarǵa jańa úıler, mal qoralary salyndy. 500 oryndyq Jastar úıi, toıhana boı kóterdi.
Qysqa túsetin qoıdyń sany 51 myńǵa, jylqy sany 2 400 basqa deıin ósti. 1986 jyldyń qorytyndysynda sharýashylyq elimizdiń qoı túligin damytýmen aınalysatyn sovhozdardyń ishinde jeńimpaz atandy. Mal sharýashylyǵy ónimderin óndirýdi, satyp alýdy arttyrý jolynda atqarǵan eńbekteri baǵalanyp, sharýashylyq ujymy Qyzyl Týmen marapattaldy. Dırektorǵa jańa ÝAZ avtókólik, sovhoz eńbekkerlerine 3000 rýbl, sharýashylyqqa bir avtobýs syıǵa tartyldy. Keıin memleket qaıratkeri Shábden Eralıevtiń esimi berilgen osy sharýashylyqty B.Qasenov 1991 jylǵa deıin basqardy.
1992 jyly, aýdandyq aýyl sharýashylyǵy bóliminde qyzmette júrgeninde aýdan basshylary Beıbit Baıbosynulyn Mońǵolııa memleketiniń Baıan-О́lgeı aımaǵynan qandastardy kóshirip ákelýge jiberdi. «Elge Baıan-О́lgeıden 46 otbasyn (150 adam) kóshirip ákelip, aýyldarǵa 10-15 otbasydan ornalastyrdyq, jumys, baspana berdik», deıdi Beıbit aǵa áńgimesinde.
1993 jyldan aýdandyq aýyl sharýashylyǵy bólimin, 2000–2004 jyldary aýdandyq jumyspen qamtý, áleýmettik sala bólimin basqardy. 2004–2011 jyldary, zeınetkerlikke shyqqansha aýdan ákiminiń orynbasary qyzmetin atqardy. Búginde B.Qasenov – Jańaarqa kenti ardagerler keńesiniń tóraǵasy, aýdan ákimi apparatynyń keńesshisi qyzmetin qosa atqarady. Sol turǵyda aýdan turǵyndarynyń turmystyq jaǵdaıyn, áleýmettik máselelerin sheshýge udaıy yqpal etip, kómektesip otyrady.
2019 jyly Jańaarqa aýdanynyń 90 jyldyǵy, memleket jáne qoǵam qaıratkeri, aqyn Sáken Seıfýlınniń týǵanyna 125 jyldyǵy keń kólemde atalyp ótti. Merekede tuńǵysh ret «10 000 lıtr qymyzdy bir mezette 1000 kúbige quıyp, pisý» sharasy uıymdastyrylyp, Jańaarqa qymyzy Gınnestiń rekordtar kitabyna endi. Osy izgi isti uıymdastyrýshy, ıdeıa avtorlarynyń biri B.Qasenov boldy.
2021 jyly Táýelsizdiktiń 30 jyldyǵyna oraı elimizdegi alty myńnan astam eldi mekenniń ishinen Jańaarqa aýdanynyń bir kezderi B.Qasenov dırektor bolǵan Eralıev aýyly úlgili 30 aýyl tizimine endi.
Beıbit Baıbosynulynyń sharýashylyq salasyna sińirgen esepsiz eńbegi laıyqty baǵalandy. «Eren eńbegi úshin», Aýyl sharýashylyǵy salasynyń «Qurmetti ardageri», Aýyl sharýashylyǵy mınıstrliginiń «Eńbek ardageri», basqa da birqatar mereıtoılyq medaldarmen marapattaldy.
B.Qasenov – segiz qyrly, bir syrly azamat. 1994 jyldan beri Jańaarqa aýdanynyń «At sporty federasııasyn» basqaryp keledi. Jańaarqa aýdandyq ulttyq sport qaýymdastyǵynyń tóraǵasy. Qaýymdastyqtyń tikeleı basshylyǵymen aýdan ortalyǵynda, keıbir aýyldarda at shabatyn, ulttyq oıyndar ótetin jarys alańdary salyndy.
Sondaı-aq Beıbit aǵa – tanymal ánshi, áýesqoı sazger. Shymkent qalasynda ótken Shámshi Qaldaıaqov ánderin oryndaýshylarynyń respýblıkalyq baıqaýyna qatysyp, júldeger atanǵan. «Qazaqtyń dastarqany», taǵy birneshe óz janynan shyǵarǵan ánderi bar. Rýhanııat salasyna qosqan úlesi de eleýsiz emes. 2017 jyly «Qurmetti sport qyzmetkeri», 2021 jyly «Mádenıet salasynyń úzdigi» tósbelgilerin keýdesine taqty. Búginde el aǵasy atanyp otyrǵan B.Qasenovtiń óristi ómir joly keıingi tolqyn iniler men óskeleń urpaqqa taǵylymdy úlgi-ónege.
Ulytaý oblysy
