Ádette sezim músheleriniń biri isten shyqsa, onyń ornyna basqa qasıet erekshe damyp, adamnyń beıimdelý qabileti arta túsetini belgili. «Ekstrabılıtı-2025» týrnıriniń ereksheligi de osy qaǵıdatqa negizdelgen. Osy joly qatysýshylar boýlıngti kózin baılap oınady.
Uıymdastyrýshylardyń aıtýynsha, mundaı format qoǵamda ınklıýzıvti jandardy qoldaýǵa jáne «ekstrabılıtı» uǵymyn tereń túsindirýge baǵyttalǵan. Qatysýshylar tek jeńis úshin emes, ishki áleýetti ashý úshin synǵa tústi.
Táýekel Naýryzbaev – erekshe baıqaýdy ótkizýge muryndyq bolyp otyrǵan birlestik múshesi. Ol osyndaı formattaǵy oıyn álemdik úlgidegi jetilgen tájirıbe ekenin aıtady. Elimizde bul úshinshi jyl qatarynan ótkizilip otyr.
«Eki kózi kórmeıtin adamnyń, túısigi myqty bolady. El ishinde muny «úshinshi kóz» nemesi «kókirek kózi» dep jatady. Ol ár adamnyń ishindegi buǵyp jatqan qýat. Boýlıngti kózdi baılap oınaý sezgirlikti, keńistikti sezinýdi, zeıin qoıýdy jáne este saqtaýdy úıretedi. Eń bastysy zaǵıp jandardyń álemine boılap kóredi. Bul qoǵamdaǵy túsinistik pen baýyrmaldyqty arttyrady dep esepteımiz», deıdi Táýekel Naýryzbaev.
Týrnırge memlekettik mekeme qyzmetkerleri men «Múgedek jastar qoǵamy» birlestiginiń músheleri qatysty. Is-shara sońynda uıym tóraǵasy Murat Ábdimomynov oıynshylarǵa alǵysyn bildirip, úzdikterdi arnaýly kýbok jáne dıplomdarmen marapattady.
