Qaraǵandy oblysy bıylǵy týrıstik maýsymda 500 myńǵa jýyq týrısti qabyldaýǵa daıyn. Balqash qalasynyń ákimi Sapar Sataevtyń málimdeýinshe, ótken jyldyń qorytyndysy boıynsha týrızm salasyndaǵy negizgi kórsetkishter turaqty ósim kórsetip otyr.
Týrısterge qolaıly jaǵdaı jasaý maqsatynda mobıldi qosymshalar, QR-gıdter, baǵyttaýshy, aqparattyq belgiler engizilip jatyr. Infraqurylym men qyzmet sapasynyń artýy nátıjesinde óńirge keletin týrıster sany jyl saıyn 10-15%-ǵa ósip keledi. Týrızm salasyndaǵy shaǵyn jáne orta bıznes sýbektileri de 10%-dan astamǵa artqan.
Festıval aıasynda eki kún boıy ınfotýr ótti. Oǵan respýblıkalyq, óńirlik buqaralyq aqparat quraldarynyń ókilderi, tanymal trevel-blogerler men týroperatorlar qatysty. Infotýrdyń mundaǵy maqsaty – óńirdiń týrıstik áleýetin ilgeriletý, festıvaldiń tanymaldylyǵyn arttyrý. Týrǵa qatysýshylar elimizdegi alǵashqy «QAZ ELI» onlaın brondaý júıesimen tanysty. Bul platforma qonaqúı, páter, demalys oryndary, pansıonat, ekskýrsııa, kólik qyzmetterin onlaın túrde brondaýǵa múmkindik beredi.
Baǵdarlama aıasynda qatysýshylar «Balkhash Tour Fest» aýmaǵyna, Bektaýatadaǵy kórkem etnoaýylǵa, sondaı-aq Balqash óńiriniń mádenı, tabıǵı murasyn tanytatyn, tanystyratyn negizgi týrıstik nysandarǵa bardy.
«Týrızmdegi ınnovasııalar» atty semınarda ishki týrızmdi damytý joldary, sıfrlyq sheshimder men kásipkerlikti qoldaý tetikteri qaraldy. Balqash qalasynyń ákimi S.Sataev jyl saıyn elimizde shaǵyn jáne orta bıznesti qoldaýǵa baǵyttalǵan jumys júıeli túrde júrgizilip, Memleket basshysynyń tapsyrmasy aıasynda Balqash qalasynda da kásipkerlik salasyn damytýǵa erekshe kóńil bólinip otyrǵandyǵyn baıandady.
– Is-shara barysynda ótken jyly 25 saýda orny jumys istese, bıyl olardyń sany 90-ǵa jetti. Bul – qaladaǵy isker azamattardyń belsendiligi men memleket tarapynan jasalyp jatqan qoldaýdyń naqty kórinisi. «Tour Fest» aıasynda jergilikti kásipkerlerdiń 40-tan astam pavılony ashylyp, halyqqa ónimderin usyndy. Bul – bıznestiń týrızmmen tyǵyz baılanysynyń naqty mysaly. Qala ákimdigi tarapynan festıval ótkizýge barynsha qoldaý kórsetilip, logıstıka, qaýipsizdik sharalary, sanıtarlyq talaptar tolyq qamtamasyz etilip otyr, – dedi shahar basshysy.
Festıval «Taza Qazaqstan» ulttyq jobasy aıasyndaǵy túrli ekologııalyq bastamalarmen erekshelendi. Atap ótsek, Qaraǵandy oblysy jastar resýrstyq ortalyǵynyń bastamasymen 60 erikti Balqash óńirinde «ROAD-estafeta» ótkizdi. Olar «Qaraǵandy-Almaty» avtojolynyń boıyn turmystyq qaldyqtan tazartyp, eskertý taqtaıshalaryn ornatty. Sonymen qatar Bektaýata jartasyndaǵy jazýlardy óshirip, tabıǵı, mádenı muraǵa qurmet kórsetýdiń úlgisin kórsetti. «Ekinshi ómir» jobasy da erekshe nazar aýdartty. Arnaıy ornatylǵan alyp balyq-ınstallıasııanyń ishine qatysýshylar plastık bótelkeler tastap, qoqysty suryptaýǵa qatysty.
Sonymen qatar is-shara aıasynda Fýd-kort jáne qolóner jármeńkesi uıymdastyrylyp, Balqashtyń qolónershileri óz buıymdaryn tanystyrdy. Ásirese Vera Harkevıch pen uly Tımoteniń qıyrshyq tastan quralǵan Tic-Tac oıynyn kópshilik qyzyǵa oınady.
Ekologııalyq kross-jarystar (ekokrosstar) – tabıǵatty qorǵaý men salamatty ómir saltyn nasıhattaýdyń jarqyn úlgisi. Zýmba men ıoga jattyǵýlaryna qatysqandardyń da qarasy qalyń boldy. Balalar qumnan saraı turǵyzdy. Batpyraýyq ushyrý saıysy aspandaǵy túrli-tústi beınelermen Balqashtyń kógin kórkemdedi.
Qonaqtar Bektaýataǵa da baryp, atqa miný, sıyr saýý, sadaq atý sııaqty aýyl tirshiligimen tanysty. Sonymen qatar keshki ýaqytta uıymdastyrylǵan ashyq aspan astyndaǵy kınoseans pen mýzykalyq qoıylymdar jaǵalaýdaǵy keshtiń sánin keltirdi.
Festıvaldiń gala-konsertinde Nazıma, Qanay, «Kılımandjaro» toby, «Araı» toby, Janbolat Uzaqbaev, «Toqyraýyn tolqyndary» ansambli óner kórsetti. «Balqash kóliniń ańyzy» atty sý ekranyna negizdelgen mýltımedııalyq sýburqaq shoý festıvaldiń jańalyǵy boldy.
Sý qoıylymy mýzykany, jaryqty, anımasııany biriktirip, qonaqtarǵa erekshe kóńil-kúı syılady.
Festıvalde erekshe taǵamdar ázirlenip, aspazdar saıysqa tústi. Salmaǵy 53 kılo qazybýrger kópshiliktiń qyzyǵýshylyǵyn týdyrdy. Bul erekshe jobany Balqash nan zaýyty men «Baýyrdaq» meıramhanasy birlesip ázirledi. Ulttyq taǵam men zamanaýı formatty úılestirgen bul býrgerdiń quramyna dástúrli qazy, arnaıy pisirilgen alyp býrger nany, kókónister, dámdeýishter qosyldy. Meımandar erekshe taǵamnyń dámin tatyp kórdi. Dámi men kórinisine joǵary baǵa berip, áleýmettik jelilerde áserlerimen bólisti.
Eki kúnge sozylǵan týrızm toıynyń sońy Balqash aspanyndaǵy túrli-tústi otshashýmen aıaqtaldy. Uıymdastyrýshylar kelesi jyly festıval aıasyn keńeıtip, budan da áserli baǵdarlamalarmen tańqaldyrýdy josparlap otyr.
Balqash qalasyna alǵash ret kelgen Májilis depýtaty Dáýlet Muqaev mundaı bastamalardyń elimizdiń óńirlerin tanymal etýge, jas býynnyń elge degen qyzyǵýshylyǵyn arttyrýǵa qosar úlesin erekshe atap ótti.
– Balqash qalasyna birinshi ret kelip otyrmyn. «Balkhash Tour Fest» syndy jobalar – elimizdiń ishki týrızmin damytýdyń naqty mysaly, jastarǵa týǵan jerdiń kıesin, sulýlyǵyn tanytý, olardyń boıynda týrızm mádenıetin qalyptastyrý jolyndaǵy mańyzdy qadam. Osyndaı is-sharalar arqyly óńirlerdiń áleýeti artyp, ulttyq biregeılik nyǵaıady, – dedi D.Muqaev.
Qaraǵandy oblysy,
Balqash qalasy
