Aldymen depýtattar mýzeı aýmaǵynda salynyp jatqan vızıt-ortalyqtyń qurylysymen tanysyp, nysannyń qazirgi jaı-kúıin kózben kórdi. Mekeme dırektory Gúlmıra Muhtarovanyń aıtýynsha, týrısterge arnalǵan bul nysannyń qurylysy 2023 jyly bastalǵan. Qazirgi tańda tek negizgi jumystyń 75 paıyzy oryndalǵanymen, tolyq aıaqtaýǵa qajetti qarajat bólinbegen. Bastapqy jobalyq-smetalyq qujattama boıynsha 292,3 mln teńge qarastyrylsa, ázirge 87,7 mln teńge ǵana ıgerilgen. Qurylys materıaldary men jumys kúshiniń qymbattaýyna baılanysty jobanyń jalpy quny 446,1 mln teńgege deıin ulǵaıǵan.
«Qurylystyń úshten biri toqtap tur. Bul ortalyq óńirge kelgen týrıster úshin negizgi vızıt-núkte bolýy tıis edi. Qarjy tolyq bólinbegendikten tek ǵımarat emes, sý júıesine qosý, kógaldandyrý sııaqty ınfraqurylymdyq jumystar da toqtap qaldy. Sondaı-aq mýzeı qoryndaǵy Altyn adamnyń súıegin ǵylymı negizde ekspozısııaǵa shyǵarý jumystary jyldar boıy iske aspaı keledi. Mýzeı men jergilikti mektep arasyndaǵy bos aýmaqta etnoaýyl qurý jobasy da qoldaý tappaı otyr», – dedi mýzeı dırektory.
Májilis depýtaty Aıdos Sarym Esik mýzeıiniń tarıhı jáne mádenı mańyzyn atap ótip, Altyn adam tabylǵan bul mekenniń respýblıkalyq qana emes, halyqaralyq týrıstik marshrýttyń mańyzdy bóligine aınalýy tıis ekenin aıtty. Onyń sózinshe, bul nysan tek arheologııanyń emes, tutas ulttyq bolmystyń sımvolyna aınalýy kerek. Depýtattar atalǵan problemalardy Úkimet pen tıisti mınıstrlikter deńgeıinde kóterýge ýáde berdi.
Sapar aıasynda halyq qalaýlylary Talǵar aýdanyndaǵy Oi-Qaragai taý-kýrortyndaǵy ınfraqurylym jaıyna da nazar aýdardy. Kýrort basshylyǵynyń aıtýynsha, jyl saıyn júz myńdaǵan týrıst qabyldaıtyn demalys aımaǵy bolashaqta óńirlik týrızmniń negizgi ortalyǵyna aınalýy múmkin. Degenmen, jańa nysandar salýǵa qajetti jer telimderi máselesi uzaq jyldar boıy sheshimin tappaǵan.
Májilis depýtaty Baqytjan Bazarbektiń aıtýynsha, Oi-Qaragai mańyndaǵy birqatar jer ýchaskeleri kezinde túrli laýazymdy tulǵalardyń atyna rásimdelip, búginde ıgerýsiz bos tur.
«Oi-Qaragai aýmaǵyn keńeıtýge ınvestorlar daıyn. Biraq taýdyń bókterindegi birqatar jer telimderi kezinde túrli laýazymdy tulǵalarǵa berilgenimen, ıgerilmeı bos tur. Kýrort ákimshiligi bul máseleni birneshe ret kóterdi. Jer kodeksiniń 92-babyna sáıkes, mundaı telimderdi memleketke qaıtarý prosesin osy joba aıasynda qolǵa alamyz. Bul baǵytta tıisti jumystardy bastaımyz», – dedi Baqytjan Bazarbek.
Aıta ketý kerek, óńirde «AMANAT» partııasy taý týrızmin damytýǵa baǵyttalǵan «Alataý amanaty» jobasyn iske qosty. Joba aıasynda Almaty oblysyndaǵy biregeı tabıǵı jáne tarıhı nysandardy biriktiretin, uzyndyǵy 1200 shaqyrymnan asatyn ulttyq týrıstik soqpaq salý josparlanǵan.
Almaty oblysy.
