Foto: shutterstock.com
Tımýr Súleımenovtiń aıtýynsha, Ulttyq Bank makroekonomıkalyq jáne qarjylyq turaqtylyqty qamtamasyz etýge baǵyttalǵan jumysyn jalǵastyrady. Inflıasııanyń ósý táýekelin tejeý úshin elde dezınflıasııalyq saıasat júrgizilmek. Aqsha-kredıt quraldaryna qosymsha retinde birqatar keshendi sharalar qolǵa alynýda.
Atap aıtqanda:
– altyn satyp alý aıasynda valıýtalyq operasııalar teńgerimin saqtaý jalǵasady;
– jeke tulǵalardyń nesıeleri boıynsha kontrsıkldik kapıtal býferi engiziledi;
– bankter úshin mindetti rezervterdiń eń tómengi talaptaryn arttyrý pysyqtalýda;
– Ulttyq qor men Biryńǵaı jınaqtaýshy zeınetaqy qory portfelindegi kiristiligi joǵary aktıvterdiń úlesin kóbeıtý kózdelip otyr.
Sonymen qatar qarjy sektorynyń sıfrlyq transformasııasy jalǵasyp jatyr. Sıfrlyq teńgeni masshtabtaý jumystary júrgizilýde. Bul baǵyt memlekettik qarjyny basqarýda jańa tásilderdi qoldanýdy qamtıdy.
Memleket basshysynyń tapsyrmasyna sáıkes bıyl elimizdiń qarjy zańnamasyn keshendi jańǵyrtý jospary ázirlenýde. Bul paket bankter, tólem júıeleri, baǵaly qaǵazdar naryǵy jáne sıfrlyq qarjy aktıvterin retteý máselelerin qamtıdy. Ulttyq sıfrlyq qarjy ınfraqurylymyn qalyptastyrý men tólem naryǵyn damytý da basym baǵyttardyń qatarynda.
Ulttyq Bank basshysy atap ótkendeı, bul bastamalar qarjy júıesiniń tıimdiligin arttyryp qana qoımaı, ekonomıkanyń túrli salalaryna serpin beredi jáne azamattardyń ál-aýqatyn jaqsartýǵa yqpal etedi.
