Enbek.kz – jastarǵa arnalǵan sıfrlyq múmkindik

Jaz – tek demalys ýaqyty emes, alǵashqy eńbek tájirıbesin jınap, óz betimen tabys taýyp kórýge tamasha múmkindik. Eńbek jáne halyq­ty áleýmettik qorǵaý mınıstri Svetlana Jaqypovanyń aıtýynsha, zańǵa sáıkes jumys isteýge ruq­sat etilgen 14 pen 18 jas aralyǵyn­daǵy mektep oqýshylarynyń sany 1,4 mln adamdy quraıdy, onyń 26,5 myńy – erekshe balalar.

Qazirgi tańda 24,3 myńǵa jýyq oqýshy jazǵy jumyspen qam­tylǵan. Eń kóp jumys isteıtin salalar – saýda (5,3 myń bala) jáne turǵyn úı men qoǵamdyq tamaqtaný qyzmetteri (3,6 myń). Bul kórsetkish jyl saıyn artyp keledi. Árıne, oqýshylar úshin eńbek – tek tabys kózi emes, ómirlik tájirıbe, kásibı baǵdar, tártip pen jaýapkershilik mektebi.

Mınıstr osy baǵytta arnaıy onlaın quraldardyń iske qosyl­ǵanyn aıtty. Atap aıtqanda, «Elektrondyq eńbek bırjasy» platformasynda «Meniń jazǵy demalysym» atty bólim ashylǵan. Bul bólim arqyly 14 jastan asqan mektep oqýshylary men stýdentter onlaın túrde tirkelip, jeke kabı­net ashyp, túıindeme jarııa­laı alady. Bul balalardyń sıfr­lyq sa­ýatyn arttyryp, óz betimen sheshim qabyldaı bilýge daǵdy­landyrady. Al 16 jasqa deıingi oqýshylar úshin tirkeý men jeke ka­bı­net qurýdy olardyń ata-anasy nemese qamqorshysy júzege asyrady.

Jastardyń eńbek naryǵyna beıimdelýin jeńildetý úshin «enbek.kz» júıesimen qatar «Skills.Enbek» onlaın-platformasy jumys isteıdi. Munda oqýshylar óz qyzyǵýshylyǵyna saı túrli baǵyttaǵy daǵdylardy meńgere alady. Qazirgi tańda onda 1 200-den astam kýrs qoljetimdi, onyń 322-si – tegin, al 137 kýrs qazaq tilinde usynylǵan. Bul – kásibı baǵyt-baǵdaryn endi aıqyndap jatqan jas býyn úshin taptyrmas múmkindik.

Jas býyn úshin taǵy bir mańyz­dy sheshimderdiń biri – bolashaq mamandyǵyn durys tańdaý. Osy rette «Mansap kompasy» atty platforma jastarǵa óz beıimdiligi men qabiletin anyqtaýǵa kómektesedi. Munda túrli testileý arqyly kásibı qyzyǵýshylyqtar anyqtalyp, sura­nysqa ıe maman­dyqtar jóninde keń kólemde aqparat beriledi. Sondaı-aq qaı oqý ornynda bilim alýǵa bolatyny týraly nusqaýlar da qamtylǵan.

S.Jaqypova jazǵy dema­lys kezinde jergilikti ákim­dikter tarapynan qoǵamdyq ju­mys­tardy uıymdastyrý táji­rıbesi jalǵasatynyn da atap ótti. Bul jumystar arnaıy daıyn­dyqty qajet etpeıdi, ıkemdi keste boıynsha oryndalady jáne ekonomıkalyq, áleýmettik nemese ekologııalyq paıda ákelýge tıis. Mundaı jumys úshin oqýshylarǵa aı saıyn keminde 24 AEK (2025 jyly – 94 368 teńge) kóleminde jalaqy tólenedi.