Saladaǵy eleýli jańalyq – bıyl Astanada iske qosylǵan «Stadler Kazakhstan» zaýyty. Shveısarııalyq tehnologııaǵa negizdelgen bul kásiporyn – temirjol mashına jasaýynda óndiristi oqshaýlaý men transformasııany tereńdetý baǵytyndaǵy mańyzdy qadam. Zaýyt tek ónim óndirýmen ǵana shektelmeı, jańa tehnologııalar men maman daıarlaý isin qatar alyp júrýge múddeli. Bul óz kezeginde jergilikti qamtýdy arttyryp, elimizdiń óndiristik táýelsizdigin nyǵaıtýǵa úles qosady.
Atalǵan kásiporynmen qatar, elimizde temirjol tehnıkasyn shyǵarýmen aınalysatyn taǵy tórt óndiris orny jumys istep tur. Olar – Petropavl, Ekibastuz, Atyraý jáne Astanada ornalasqan kásiporyndar. Bul zaýyttar ishki naryqty qamtamasyz etip qana qoımaı, eksporttyq áleýetti de birtindep damytyp keledi.
Búginde Qazaqstan temirjol kóligin jańartýǵa erekshe nazar aýdaryp otyr. Kólik mınıstrligi qyzmet etý merzimi uzartylǵan vagondardy paıdalanýǵa shekteý engizý bastamasyn kóterdi. Bul – qaýipsizdik pen sapany birinshi orynǵa qoıýǵa baǵyttalǵan qadam. Qazirgi ýaqytta tıisti normatıvtik qujat ázirlenip, kelisý rásimderinen ótip jatyr.
Shekteý engizý arqyly eski vagondar birtindep naryqtan shyǵarylyp, onyń ornyna zamanaýı, ekologııalyq jáne tehnıkalyq talaptarǵa saı jańa jyljymaly quram engizilmek. Bul shara vagondar parkiniń jasarýy men otandyq zaýyttarǵa degen suranystyń artýyna jol ashady.
Bul bastamany der kezinde júzege asyrý úshin Úkimet te tıisti tapsyrmalaryn jedeldetip otyr. Vıse-premerdiń tapsyrmasyna sáıkes, Ulttyq ekonomıka mınıstrligi normatıvtik qujattyń jedel qabyldanýyna qajetti rásimdik kedergilerdi qysqa merzim ishinde sheshýge mindetteldi. Bul – naqty sheshimder kezeńine ótip jatqan bastamanyń jaqyn arada iske asyrylatynyn bildiredi.
