Tabıǵaty tamyljyǵan Zerendiniń kórkem bir pushpaǵynda kóz jaýyn alatyn etnoaýyl paıda boldy. Qutty bir qaımaǵy buzylmaǵan kóshpeli zamannyń kórkem kórinisi ispetti. Aýdandaǵy birneshe aýyldan saba-saba qymyz ákelip, mol dastarqan jaıylǵan. Kók shalǵyny uıysqan saıyn dala dombyranyń kúmbirlegen únimen terbele tebirenip turǵandaı. Aıtpaqshy, berekeli aýdannyń merekeli 90 jyldyǵy bıyl atalyp ótip jatyr. Qymyz festıvali osy bir aıtýly datamen oraılastyrylǵan.
Janǵa jaıly salqyn samal esip tur. Jınalǵan jurt iltıpatpen usynǵan bal qymyz, dónen qymyz, besti qymyz tárizdi ártúrli ádispen daıyndalǵan astan dám tatty.
«Qymyz daıyndaý tásilin anamnan úırenip edim, – deıdi bal qymyzdy baptaǵandardyń biri Gúljııan Dáýlethanqyzy. – Qazir qyzdarymdy úıretip júrmin. «Suńqar» balalardy saýyqtyrý keshenine daıyndap beremin. Demalýshy balalar densaýlyǵyn túzese, nur ústine nur emes pe?»
Kelesi bir kıiz úıde Bulaq, Sadovyı, Saryózek aýyldarynyń turǵyndary dastarqanǵa sapyrylǵan sary qymyzben birge el ishinde ilýde bir kezdesetin eshki súti men qaımaq, qazy-qarta qoıypty. Qymyzdy Sánııa men Baqytjan Muhanbetovter daıyndaǵan eken. Bul dastarqandaǵy qymyz qazylar alqasynyń kóńilinen shyqty. Qymyz festıvalin ótkizý ıdeıasyn qoldaǵan jylqy fermasynyń ıesi Murathan О́ner: «Osy tamasha dástúrdi jyl saıyn ádemilep ótkizip otyrsa, bul kúnde keı óńirde kózden bulbul ushqan ulttyq taǵamǵa keıingi jastardyń nazary aýar edi», deıdi.
«Kelesi festıvaldy ótkizgen kezde meımandarǵa yńǵaıly bolý úshin oryndyqtar jasap qoıamyn», deıdi Zerendi aýylynyń turǵyny Nına Lınnık. – Osy is-sharadan-aq qazaq halqynyń meıirim shapaǵaty kórinip tur emes pe?»
Aq dastarqan basynda el tarıhyn ekshegen ajarly áńgime aıtyldy. Kóne tarıhtyń kómbesi ǵana aqtarylǵan joq, keleshektiń mejesi de tilge tıek boldy. Atam qazaq «bir kún dámdes bolǵanǵa qyryq kún sálem» demeı me, bir dastarqannan dám tatqan san alýan ult ókili bir-birimen qımaı qoshtasty.
Aqmola oblysy,
Zerendi aýdany
