Senat depýtaty Andreı Lýkın «iKomek 109» – Astana qalasy ákimdiginiń Qalalyq monıtorıng jáne áreket etý ortalyǵynda boldy. Senatordyń aıtýynsha, ortalyqtyń qazirgi qyzmeti sıfrlyq servısterdiń mindetimen saı kelip tur. Azamattardyń ótinishi lezde esepke alynyp, elordanyń shuǵyl jáne kommýnaldyq qyzmetterimen ózara is-qımyl jedel jolǵa qoıylǵan. Operatorlar qala turǵyndarynyń suranysyna jaýap berý jyldamdyǵyn odan ári arttyrmaq.
«iKomek 109» – jaı ǵana koll-ortalyq emes, Astana turǵyndary men jergilikti ózin-ózi basqarý organdary arasyndaǵy jedel jáne ózara sapaly is-qımyldy qamtamasyz etetin tolyqqandy keri baılanys júıesi. Osy jyldyń alǵashqy jartysynda 90 paıyzdan asa ótinish merziminde qaralǵan. Mundaı tásil elimizdiń basqa óńirlerinde de engizilýge tıis», dedi A.Lýkın.
Depýtat sonymen qatar Nura jáne Esil aýdandarynyń basshylyǵymen jáne aktıvimen kezdesýler ótkizdi. Onda aýmaqtardy damytý, abattandyrý, áleýmettik ınfraqurylym jáne halyqpen keri baılanys máseleleri talqylandy.
Al senatorlar Sultan Dúısembınov pen Ǵalıasqar Sarybaev Jetisý oblysyndaǵy Qaratal aýdanynda mádenıet, sport, densaýlyq saqtaý jáne áskerı shaqyrý júıesin damytýǵa baılanysty birqatar negizgi nysandy aralady.
Depýtattar mádenıet úıinde mádenı-demalys qyzmetin uıymdastyrý, jastardy shyǵarmashylyq turǵyda damytý jaǵdaıymen jáne materıaldyq-tehnıkalyq bazanyń jaı-kúıimen tanysty. Olar sondaı-aq sport kesheni men ústel tennısine arnalǵan zalda bolyp, seksııalardy qarjylandyrý, sport rezervi men kadr daıarlaý máselelerin talqylady. Aýdandyq aýrýhanada medısına qyzmetkerlerimen kezdesip, ǵımaratty kúrdeli jóndeý, mamandarmen jáne jabdyqpen qamtamasyz etý, dıagnostıka qyzmetterine qol jetkizý múmkindikterimen tanysty.
«Medısınalyq qyzmet kórsetý aýyl turǵyndaryna da sapaly jáne qoljetimdi bolýy kerek. Ár azamat turǵylyqty jerine qaramastan, bilikti medısınalyq kómekti ýaqtyly jáne tıimdi túrde alýǵa quqyly», dedi S.Dúısembınov.
Áskerge shaqyrý pýnktinde bolǵan depýtattar áskerge shaqyrý naýqanyn uıymdastyrý, medısınalyq komıssııadan ótý, sondaı-aq jastardy patrıottyq rýhta tárbıeleý jáne jalpy halyqtyń áskerge degen senimin arttyrý máselelerin sóz etti.
«Áskerge shaqyrylýshy birinshi kúnnen bastap óz eline qajet ekenin, ózin qoldaıtynyn, qurmet pen senimdi sezinetin júıe qalyptastyrýymyz kerek. Shaqyrý rásimi atústi nemese selqos ótpeýi kerek, Otanǵa qyzmet etý sanaly túrde bolǵany jón. Dál osy kezeńde Qarýly kúshter ınstıtýtyna degen senimniń negizi qalanady, al ol áskerı qyzmettiń bedelin arttyrady», dedi Ǵ.Sarybaev.
Sondaı-aq Senat depýtaty Aıgúl Qapbarovanyń Shymkent qalasyna sapary jalǵasyp jatyr. Ol mádenı jáne shyǵarmashylyq sala qyzmetkerlerimen kezdesti. Qazir bul salada qordalanǵan másele kóp. Kezdesýde qatysýshylar salany jańǵyrtýǵa júıeli ózgerister kerek ekenin aıtty. Atap aıtqanda, teatr, murajaı jáne ózge de mádenı mekemelerdiń biryńǵaı shtat kestesine zamanaýı jańa mamandyqtardy engizý qajet. Sondaı-aq mádenıet qyzmetkerleriniń eńbegin baǵalaý men yntalandyrý retinde qurmetti ataqtar jáne marapattar berý tetigin qaıta qaraý men keńeıtý týraly usynystar aıtyldy.
«Mádenı salany qoldaý – ulttyń rýhanı damýyna salynǵan ınvestısııa. Biz jas mamandardyń kelýine jaǵdaı jasap, óner salasyndaǵy kásipterdiń kásibı standarttary men bedelin nyǵaıtýymyz kerek. Bul tek sabaqtastyqty emes, qazirgi otandyq mádenıettiń damýyn da qamtamasyz etedi», dedi A.Qapbarova.
