Foto: egemen.kz/Erlan Omar
2024 jyly Astana qalasynyń TJD qyzmetkerlerine 50 páter berilgen. Úzdik úrdisti jalǵastyrý maqsatynda búgin 15 maman páter kiltin qolyna ustady. Jańa qonys ıeleriniń qatarynda qutqarýshylar, júrgizýshiler jáne bólimshe komandırleri bar. Olardyń basym bóligi salada ondaǵan jyldar qaltqysyz qyzmet etip keledi. Eńbek jolyn órt sóndirýshi bolyp bastaǵan Serik Esenov búginde asa mańyzdy nysandardy qorǵaý bólimin basqarady. Keler jyly zeınetke shyǵatyn ol bas qaladan baspanaly bolýyn eńbektiń óteýine balaıdy.
«Keıingi jyldary qutqarýshylardyń jaǵdaıyn ońaltýǵa jetkilikti dárejede kóńil bólinip jatyr. Jaqynda órt sóndirýshilerge de turǵyn úı tólemi beriletini týraly habar da kóńilge qýanysh syılady. Budan bólek tehnıkalyq baza da jańartylyp jatyr. Munyń bári minsiz qyzmet etýge edáýir yqpal etedi», dedi ol.
Qutqarýshylarǵa berilgen baspana tek sala sańlaǵynyń ǵana emes - onyń otbasynyń da ortaq jeńisi. Endi Seriktiń jubaıy Anarmen birge tálim quıyp otyrǵan 3 balasy da óz úıinde erkin er jetedi. Januıa tarıhynda qalatyn aıtýly kúnde Anar Esenova kún-tún qyzmet jolynda qaımyqpaǵan jubaıynyń eńbegi elengenine dán rıza.
«24 jyl qutqarýshy bolyp qyzmet etken joldasym jumysyna qatysty esh shaǵym aıtyp kórmepti. Men munysyn ár kúni qaýip-qatermen betpe-bet kelse de jumysyn jaqsy kóretini dep túsinemin. Joldasymnyń qyzmetiniń qıyn tusyn biz de tereń túısinemiz. Sondyqtan jumysyna Allaǵa amanat etip shyǵaryp salamyz. Búgin mine, mınıstrdiń qolynan páter kiltin aldy. Bul - árkimge buıyra bermeıtin baq, mártebe», dedi Anar Nurbekqyzy.
Qutqarýshylardy zamanaýı tehnıkalarmen qamtamasyz etý de qyzmettiń tıimdiligin arttyryp, adam ómirin der shaǵynda arashalaýǵa aıtarlyqtaı kómek. Búgingi sharada tehnıkalyq bazany da jańartý nazardan tys qalmaı, 18 TJM quramdary 18 avtokólipen tolyqty. Kólik kiltin alǵandar arasynda jedel qutqarý jasaǵynyń bólimshe komandıri Azamat Berdiqulov ta bar.
«2015 jyldan jedel qutqarý salasynda qyzmet etip kelemin. Qazirgi ýaqytta tehnologııa túrlenip, zamanaýı qurylǵylar shyǵyp jatyr. Onyń bári adam ómirin jeńildetip nemese saqtaýǵa arnalǵan dep aıtýǵa bolady. Biz osyndaı mańyzdy ispen aınalysatyndyqtan tehnologııalyq jetistikterdi ıgerýimiz kerek. Jetildirilgen kólikter bizge osyndaı múmkindikter beredi. Byltyr el aýmaǵynda bolǵan sý tasqyny kezinde balshyq joldarmen qıyndyqsyz ótken osyndaı tıptegi kólikter kóbeıgeni qyzmettegiler men halyq úshin ortaq paıda», dedi Azamat Berdiqulov.
Sala basshysy Shyńǵys Árinov, óz kezeginde qutqarýshylardy ómirlik qajettiliktermen qamtamasyz etý olardyń basty iske – adam ómirin qutqarýǵa tolyq kóńil bólýge jaǵdaı jasaıtynyn atap ótip, ıgi bastama jalǵasatynyn jetkizdi.
