Foto: Ashyq derekkóz
Makron bul sheshimdi Taıaý Shyǵysta turaqty ári ádiletti beıbitshilik ornatýǵa baǵyttalǵan tarıhı mindetpen túsindirdi. Ol óz jazbasyna Palestına avtonomııasynyń basshysy Mahmud Abbasqa joldaǵan resmı hatyn da qosa tirkedi.
Fransııa prezıdentiniń pikirinshe, Palestına memleketi aımaqtaǵy qaýipsizdikke eleýli úles qosa alady. Alaıda ol úshin palestınalyqtar Izraıldi tolyq moıyndap, barlyq qarýly toptardan bas tartýy qajet ekenin atap ótti.
Makron qazir negizgi maqsat retinde atysty toqtatyp, tutqyndardy bosatýdy jáne Gaza sektoryna gýmanıtarlyq kómek kórsetýdi atady. Sonymen qatar ol HAMAS qozǵalysyn qarýsyzdandyrý, Gaza sektorynda qaýipsizdikti qamtamasyz etý jáne aımaqty qalpyna keltirý qajettigin alǵa tartty.
Fransııanyń bul sheshimin Palestına bıligi jyly qabyldady. Al Izraıl premer-mınıstri Bınıamın Netanıahý bul áreketti qatań synǵa alyp, ony «terrorızmdi marapattaý» dep atady. Onyń aıtýynsha, palestınalyqtar Izraılmen qatar ómir súretin emes, onyń ornyna óz memleketin qurýdy kózdeıdi.
Aıta keteıik, qazirgi tańda BUU quramyndaǵy 193 memlekettiń 140-tan astamy Palestınany táýelsiz el retinde moıyndaǵan. Bul tizimge sońǵy bolyp Irlandııa, Ispanııa jáne Norvegııa qosyldy.
