Is-sharaǵa Oral qalalyq máslıhatynyń depýtattary, jergilikti atqarýshy organdar ókilderi, joǵary oqý oryndarynyń basshylyǵy jáne departamenttiń jeke quramy qatysty.
Qazaqstan Prezıdenti óz sózinde: «Eger biz Qazaqstandy bolashaqta damyǵan elderdiń qatarynan kórgimiz kelse jáne sheteldik ınvestısııa tartýdy kózdeıtin bolsaq, elimizde zań men tártiptiń saqtalýy basty basymdyqqa aınalýy tıis», – dep atap ótken bolatyn. Quqyqtyq tártipti qamtamasyz etý baǵytynda Memleket basshysy júktegen naqty tapsyrmalardy oryndaý – eldiń turaqty damýy men halyqaralyq bedeli úshin mańyzy zor ekeni jıynda basa aıtyldy.
Kezdesý kezinde Májilis depýtaty Abzal Quspan ishki ister organdary qyzmetkerlerine Qazaqstan Respýblıkasynyń Qylmystyq kodeksine engizilgen jańa ózgeristerdi tanystyrdy. Atap aıtqanda, stalkıng (qýdalaý), dropperlik (alaıaqtyqtyń jańa túri) jáne májbúrli neke qııý áreketteri úshin qylmystyq jaýapkershilik kózdelgeni jóninde aqparat berdi. Sondaı-aq qylmystyq zańnamany ońtaılandyrý aıasynda Qylmystyq kodekstiń birqatar babyna ózgeris engizilgeni de atap ótildi.
Jıyn sońynda depýtat jeke quram ókilderiniń túrli saýaldaryna jaýap berdi.
Batys Qazaqstan oblysy
