Foto: Shymkent ákimdiginiń saıty
Sot otyrysynda prokýror Baýyrjan Karamanov aıyptaý aktisin oqyp, bolǵan oqıǵanyń mán-jaıyn baıandady.
Tergeý materıaldaryna sáıkes, 2025 jyldyń 21 sáýirinde aıyptalýshy Ernar Jıembaı Shymkent qalalyq qurylys basqarmasynyń qurylys nysandaryn baqylaý bóliminiń basshysynan aqparat alǵan. Ol Jıembaıǵa Rýslan Berdenovtiń tapsyrmasymen «Turǵyn úı Shymkent» JShS dırektory qyzmetinen óz erkimen ketýi tıis ekenin jetkizgen.
Aıyptaý tarabynyń málimdeýinshe, osy aqparattan keıin Jıembaıda Berdenovti óltirý nıeti paıda bolǵan. Emosıonaldyq kúızelis jaǵdaıynda ol dúkennen spırttik ishimdik satyp alyp, ony kóliginde iship, keıin úıine baryp, «Saıga» markaly ańshy myltyǵyn alǵan. Myltyqty jubaıyna tıesili kóliktiń júk salǵyshynda birneshe ýaqyt alyp júrgen.
Sol kúni keshkisin Jıembaı Shymkent qalalyq ákimdigi ǵımaratyna baryp, Berdenovti kútip turǵan. Ol ákimniń orynbasaryn kórip, oǵan bes ret oq atqan. Sheneýnik jerge qulaǵan soń, Jıembaı jaqyndap baryp, taǵy oq atpaq bolǵan.
Alaıda jaralanǵanyna qaramastan, Rýslan Berdenov qarsylyq kórsetip, osy sátte onyń júrgizýshisi aralasyp, kóligimen aıyptalýshyny qaǵyp, qylmystyń aldyn alǵan.
Qylmystyq is QR QK 24-babynyń 3-bóligi jáne 99-babynyń 1-bóligi (Adam óltirýge oqtalý) boıynsha qaralyp jatyr. Negizgi sot prosesi 6 tamyz kúni saǵat 10:00-de ótedi.
Aıta keteıik, sot tyńdaýynda Rýslan Berdenov bolmaǵan. Onyń ókili sheneýniktiń qazirgi ýaqytta em qabyldap jatqanyn málimdegen. Sýdıa Berdenovke negizgi sot otyrysyna jeke kelý mindetin júktegen.
Aldyn ala tyńdaý ashyq rejımde ótken. Alaıda Jıembaı óz beınesiniń túsirilýine qarsy ekenin bildirgen.
