Foto: vıdeodan skrın/QMA
Ata-ana balasynyń densaýlyq jaǵdaıy túsirilgen beınerolıkti Instagram jáne Facebook arqyly jarnamalaǵan. Olar Túrkııadaǵy LIV Hospital klınıkasynda 84 mln teńge turatyn ota jasatamyz degen jeleýmen 1,3 mlrd teńgeden astam kólemde qarajat jınaǵan.
Alaıda balanyń emine tek 6,4 mln teńge jumsalǵan. Qalǵan qarajatqa erli-zaıypty Astanadan 3 páter, jer telimi, 5 avtokólik satyp alǵan. Sonymen qatar, qarajattyń bir bóligin qumar oıyndaryna salǵan.
Qaıyrymdylyq qarjysyn turaqty túrde alyp otyrý úshin olar jınalǵan qarajattyń úshten bir bóligin (481 mıllıon teńgeden astam) áleýmettik jelidegi paraqshalaryn jarnamalaýǵa baǵyttaǵan. Meta Ads arqyly júrgizilgen jarnama aýdıtorııany edáýir keńeıtip, qaıyrymdylyq kólemin arttyrýǵa múmkindik bergen.
«Kúdiktiler Túrkııadaǵy LIV Hospital klınıkasynda 84 mln teńge turatyn ota jasatamyz degen jeleýdi de paıdalanǵan. Qajetti soma jınalǵanymen, shetelde ota jasalmaǵan. Kerisinshe, olar Instagram paraqshasynda áýejaıdaǵy «ushyp bara jatqan» kórinisti beıneleıtin rolık jarııalap, operasııa sátti ótti degen jalǵan aqparatpen jazba salǵan», delingen Qarjy monıtorıng agenttiginiń habarlamasynda.
Kúdiktiler sotqa deıingi tergep-tekserý bastalǵanyn bilgende qylmystyq jolmen alynǵan aktıvterdi tárkileýden jasyrý maqsatynda jer telimin úshinshi tulǵanyń atyna rásimdegen. Tergeý barysynda bul mámileniń jalǵan ekeni dáleldengen.
Sot sanksııasymen qylmystyq jolmen alynǵan múlikterdiń barlyǵyna tyıym salynǵan. Kúdiktilerge qatysty bultartpaý sharasy retinde úıqamaq túri tańdalǵan. Qazirgi ýaqytta qylmystyq is sotta qaralyp jatyr.
