«Chempıondyq rýh» jobasy aıasyndaǵy is-sharaǵa djıý-djıtsý, grepplıngten halyqaralyq dárejedegi sport sheberi, Almaty oblystyq máslıhatynyń depýtaty Nursultan Orynbasarov, qoıan-qoltyq urystan úsh dúrkin álem chempıony Sara Rahmanova, grepplıngten álem chempıony Áıgerim Ábilqadyrova, djıý-djıtsýdan eki dúrkin álem chempıony Seıilhan Bolatbek, UFC Gym KZ jattyqtyrýshysy, Octagon lıgasynyń matchmeıkeri Dýman Rahym, halyqaralyq BJJ, ADCC týrnırleriniń júldegerleri Dante Leon, Gabrıel Soýza, Djankarlo Bodonı qatysty. Is-sharaǵa «Bent» JShS zaýytynyń dırektory Dinmuhamed Kýzıev, «Jastar rýhy» Almaty oblystyq fılıalynyń tóraǵasy Medet Bekbergenov, jastar uıymynyń belsendileri atsalysty.
Jobanyń resmı ambassadory N.Orynbasarov «Chempıondyq rýh» jobasy arqyly qoǵamda eńbek adamyna degen kózqarasty ózgertýge bolatynyn aıtty. Onyń pikirinshe, sport pen óndiristiń ushtasýy – jastarǵa óristi ónege.
«Búgingi shara – sport pen eńbek adamyn toǵystyrǵan rýh pen yntymaqtyń kórinisi. Chempıon bolý – tek medal alý emes, elge úlgi bolý. Biz jumysshy mamandyq ıeleriniń qoǵamdaǵy rólin erekshe baǵalaımyz. Eńbektiń qadirin bilý – naǵyz patrıotızmniń belgisi», dedi ol.
«Chempıondyq rýh» jobasy jyl sońyna deıin óńirde ártúrli formatta jalǵasady. Aldaǵy ýaqytta birqatar eldi meken men áleýmettik nysanda ashyq jattyǵýlar, motıvasııalyq kezdesýler men sporttyq is-sharalar uıymdastyrý josparlanyp otyr.
Almaty oblysy
