«Ádemi qartaıýdyń negizi – mádenıette» dep biletin Qanymjan Shotbaıqyzynyń Almaty oblysynyń mádenıet salasyna sińirgen eńbegi orasan. Táýelsiz el atanǵan alǵashqy jyldardyń qıyn-qystaý shaǵynda boıyndaǵy bilim-biligin, kúsh-qaıratyn óńir rýhanııatynyń jandanýyna sarp etti. Eńbek jolyn Talǵar aýdanynda ustazdyqtan bastaǵan Q.Sultanqulova oqý isiniń ilgerileýine izdenimpazdyqpen atsalysty. Myńdaǵan balalardyń keýdesine bilim-ilimniń sáýlesin quıdy. Ustazdyq ete júrip, oshaǵynyń tútinin tútetti, besigin terbetti. Urpaq tárbıesindegi eleýli eńbegi eskerilip, «Qazaqstan Respýblıkasy bilim berý isiniń úzdigi» atandy, mınıstrliktiń Qurmet gramotasymen marapattaldy.
Urpaq sabaqtastyǵy men tárbıesine qamqor bola bilgen bilikti pedagogtiń iskerlik, uıymdastyrýshylyq qarym-qabileti eskerilip, memlekettik qyzmetke tartyldy. 1994–1998 jyldar aralyǵynda Talǵar aýdany, odan keıinde Eńbekshiqazaq aýdany ákiminiń orynbasary bolyp, óńirdiń damýyna laıyqty úles qosty. Jaýapty qyzmetterdi abyroımen atqaryp, qos aýdannyń áleýmettik-ekonomıkalyq damýyna eselep eńbek sińirdi. Eldiń eńsesin tiktep, etek-jeńin jııýyna analyq júregimen, izgi tilegimen qamqorshy bola bildi.
Sanaly ǵumyrynyń bes jylynda, ıaǵnı 1999–2004 jyldar aralyǵynda Almaty oblysynyń mádenıet basqarmasynyń bastyǵy bolyp taǵaıyndalyp, naryq tusyndaǵy qarjy tapshylyǵynan tusaýlanǵan halyqtyq ónerdiń ón boıyna qan júgirtip, baryn qurap, joǵyn túgendep, mádenıettiń jandaýyna atsalysty. Ulttyq qundylyqtarymyzdyń janashyry bola bilgen aıaýly jan sol bir óliara shaqta mádenıetimiz ben ónerimizdi, rýhymyzdy kóterý jolynda tynym tappady. Eńbegi eleýsiz qalmaı, 2021 jyly Almaty oblysynyń qurmetti azamaty atandy.
«Ádemi qartaıý – Allanyń adamǵa bergen syıy. О́kinishke qaraı, kárilikke jete almaı qalatyndar da bar. Osy jasqa deıingi ómir jolymyzda talaı qıly kezeńderden óttik. El aldyna túspesek te, qatardan qalmadyq. Táýelsiz elimizdiń gúldenýine, halyqtyq muralarymyzdyń jarqyrap, jandanýyna shama-sharqymyzsha qyzmet ettik. Memlekettik qyzmetke birge jegilgen zamandastarymnyń, áriptesterimniń kókeıinde eldik múddege qyzmet etý qashanda janbaǵystan joǵary turdy», deıdi Qanymjan Shotbaıqyzy.
Tereń bilim-bilik, keń parasat-paıym ıesi zeınetke shyqqaly beri de qoǵamnan shet qalmaı, búginde Ádiletti Qazaqstannyń damýyna ún qosyp keledi.
«Memleket basshysy Qasym-Jomart Toqaevtyń Qazaqstan halqyna arnaǵan byltyrǵy Joldaýynda eńbek etken adamnyń qadirli bolatyny basa aıtyldy. Árkim óz isine jaýapkershilikpen qaraý kerektigin eske saldy. «Jumystyń kózin tapqan baılyqtyń ózin tabady» degen danalyqty alǵa tartty Prezıdent. Kez kelgen adam óziniń mindetin durys, adal atqaryp, adamgershilikpen jumys isteıtin bolsa abyroı bıiginen kórinedi. Sonymen qatar etken eńbegi óskeleń urpaqqa úlgi-ónege bolady», dep tolǵanady eńbek ardageri.
«Urshyǵyn ıirip, nemere-shóbereleriniń ortasynda jaıqalyp otyratyn analardyń ón boıynan baqyttyń, qýanyshtyń lebi esip turady. О́mirge qushtar adam eshýaqytta qartaıyp kelemin dep oılamaıdy, tula boıyna sińgen otanshyl qasıetimen el men jerge qyzmet etkennen, bala-shaǵanyń kúıin kúıttegennen talmaıdy, sharshamaıdy», deıdi ulyn uıaǵa qondyryp, qyzyn qııaǵa ushyryp, tili tátti nemerelerin tárbıelep otyrǵan ardaqty áje Qanymjan Shotbaıqyzy.
Almaty oblysy
