Sonyń biri – sút ónimderin shyǵaratyn «Lıder-2010». Kásiporynnyń zańgeri Arman Moldaǵazınniń aıtýynsha, óńirde aqyly joldar paıda bolǵaly zaýyttyń kólik tasymalyna ketetin shyǵyny da birshama ósip ketken. Búginde Qostanaı oblysynda eki aqyly jol jumys istep tur. Onyń biri – uzyndyǵy 163 shaqyrym bolatyn, oblys ortalyǵynan Troıskige qaraı shyǵatyn Reseı shekarasyna deıingi jol. Ekinshisi – Qostanaıdan Denısovke deıin aparatyn 151 shaqyrymdyq jol. Atalǵan eki baǵytqa da aqyly joldy aınalyp ótetin balama joldarmen de shyǵýǵa bolady.
«Alaıda aınalma marshrýt joldy 300 shaqyrymnan asa uzartyp jiberedi. Iаǵnı tegin joldar ekonomıkalyq turǵydan tıimsiz. Onyń ústine, aınalma jolmen júretin bolsaq, bizdiń kásiporyn sút satyp alatyn, daıyn ónim jetkizetin eldi mekenderdiń birazy burynnan qalyptasqan logıstıkalyq jeliden tys qalyp qoıady», deıdi kásiporyn zańgeri.
Joba aıasynda óńirde nan, jumyrtqa, sút ónimderi tárizdi halyqqa kúndelikti qajet taýarlardy shyǵarýmen jáne tasymaldaýmen aınalysatyn kásiporyndardyń tizimi jasalady. Sondaı-aq atalǵan kásiporyndar kúndelikti taýar tasıtyn aqyly joldar anyqtalyp, «QazAvtoJol» UK» AQ-nyń oblystaǵy fılıalyna jiberiledi. Keıin bul málimetter jan-jaqty taldanyp, zerdelenedi.
Qostanaı oblystyq kásipkerler palatasynyń dırektory Renat Dáýletpaevtyń aıtýynsha, monıtorıng jumysynyń nátıjesi aqyly jol tólemderiniń mólsheri bekitilgen normatıvtik aktilerdi ózgertýge negiz bolýy múmkin.
«Jobanyń basty maqsaty – áleýmettik mańyzy bar ónimderdi tasymaldaıtyn kásiporyndar úshin qolaıly jaǵdaı jasaý, sondaı-aq jol shyǵyndarynyń túpkilikti baǵaǵa áserin azaıtý» deıdi kásipkerler palatasy fılıalynyń basshysy.
Qostanaı oblysy
