Bul – Eýrazııalyq bank pen Allur avtokólik kompanııasy birigip iske qosqan Eurasian Drive jobasynyń arqasynda qol jetkizilip otyrǵan jeńildik. Búgin Astanada ótken jıynda kompanııa ókilderi jýrnalısterge jańa jobanyń erekshelikteri men artyqshylyqtaryn tanystyrdy. Olardyń aıtýynsha, avtosalonnan kólik tańdalǵan sátten bastap barlyq rásim orta eseppen bir saǵat ishinde bitedi. Buǵan deıin onlaın tirkeý tek qoldan kólik satyp alǵanda ǵana múmkin bolsa, jańa kólik alýshylar bastapqy tirkeý úshin qujattardyń qaǵaz nusqasyn mamandandyrylǵan HQO-na ózderi tapsyrýǵa tıis bolatyn. Memlekettik qyzmettermen ıntegrasııalanǵan jobanyń arqasynda avtonesıege kólik satyp alý ýaqytyn barynsha qysqartýǵa, klıenttiń bankpen, dılermen jáne memlekettik ókildermen ózara is-qımylyn jeńildetýge múmkindik bergen alǵashqy «týra sıfrlyq úderis» ómirge kelip bolyp otyr.
«Seriktesterimizben birge biz avtokólik satyp alý úderisin «úsheýi bireýinde» formatyna deıin jeńildettik: avtosalonda kólikti tańdaý, nesıe rásimdeý jáne tehnıkalyq pasport alý eshqandaı qaǵazbastylyq pen bıýrokratııasyz onlaın júzege asady. Negizi munyń bári jarty saǵat ishinde bitetin sharýa, biraq biz artyǵymen bir saǵat dep alyp otyrmyz. Bul – naryq kóshbasshysy retinde biz úshin sıfrlyq qyzmetterdi damytýdyń zańdy qadamy jáne salanyń yńǵaılylyq, jyldamdyq pen qaýipsizdik boıynsha jańa standarty. Eurasian Drive memlekettik talaptardyń barlyǵyna saı keledi jáne tolyq ashyqtyqty qamtamasyz etedi», deıdi Eýrazııalyq banktiń basqarma tóraǵasy Lázzat Satıeva.
Avtokólikti rásimdeý prosedýrasy birneshe avtomattandyrylǵan kezeńnen turady. Avtosalonnan kólik tańdalǵannan keıin, menedjer júıege klıenttiń derekterin (JSN men telefon nómiri) engizedi, sonymen qatar kólik parametrleri men bastapqy jarna mólsheri kórsetiledi. Qarjylandyrý maquldanǵan soń, klıent, bank jáne avtosalon arasyndaǵy barlyq qujat pen sharttar ESQ kómegimen onlaın túrde rásimdeledi. Al bastapqy jarnany bank kartasy arqyly nemese avtosalon kassasynda tóleýge bolady.
Mámile rastalǵannan keıin júıede sıfrlyq qujattar toptamasy avtomatty túrde qalyptasyp, kólikti tirkeý úderisi bastalady. Osy kezeńde klıent júıe arqyly tirkeý nómirin (VIP nómirdi qosa alǵanda) tańdap, memlekettik baj salyǵyn tólep, tulǵasyn rastaıdy jáne IIM-ge ótinish beredi, sondaı-aq kólikke bank kepildigin rásimdeıdi. Tehpasport birden sıfrlyq qujattar bóliminde kórinedi. Memlekettik nómirler men qujattardyń túpnusqasyn mamandandyrylǵan HQO-nan kezeksiz, ózine yńǵaıly ýaqytta alýǵa bolady.
«Jańa avtokólikterdi satyp alý kezinde alǵashqy onlaın tirkeý qyzmetiniń iske qosylýy – yńǵaıly ári zamanaýı klıenttik tájirıbege jasalǵan mańyzdy qadam. Biz bul jobada tolyq tehnıkalyq ıntegrasııany qamtamasyz etip, otandastarymyz úshin alǵashqy tolyqqandy sıfrlyq avtonesıeniń bir bólshegi bolǵanymyzdy maqtan tutamyz. Osy erekshe jobany júzege asyrý úshin bizge seriktes bolyp, tehnologııalyq qoldaý kórsetken Eýrazııalyq bankke alǵys aıtamyz», dep oıymen bólisti «Allur KT» AQ bólshek saýda baǵyty basqarýshy dırektory Muhamed Álimhanov.
Kompanııa ókilderi tolyqqandy sıfrlyq avtonesıe Allur avtosalondarynda qazirdiń ózinde qoljetimdi ekenin aıtty.
