Myńdaǵan shaqyrymdy artqa tastaǵan ol búginde jınaǵan tájirıbesin jas býynǵa úıretip keledi.
Poıyzdardyń ýaqytynda júrýi men jolaýshylardyń qaýipsizdigi – temirjol mamandarynyń kásibı biliktiligine tikeleı baılanysty. Talǵat Qusaıynov bul salaǵa mektep bitirgen soń kelgenin aıtady.
Talǵat Qusaıynov, Pavlodar lokomotıv paıdalaný deposynyń mashınıst-nusqaýshysy:
– Mamandyqty tańdaýyma kórshilerim sebep boldy. Olardyń formasy, temirjoldaǵy tártip pen salmaqty beınesi qatty áser etti. Solarǵa qarap men de osy joldy tańdadym. Aldymen mashınıst kómekshisi boldym, bizdegi kóp jigit osy kezeńnen ótedi.
Temirjolmen birge tynystap kele jatqan bilikti maman búginde jas áriptesterine baǵyt-baǵdar berip júrgen tájirıbeli tálimger. Ujymda da onyń bedeli joǵary.
Nıkolaı Koltakov, Pavlodar lokomotıv paıdalaný deposynyń mashınısi:
– Talǵat – óte baısaldy, jumysyna asa jaýapkershilikpen qaraıtyn tájirıbeli maman. Árıne, onyń talapshyldyǵyn aıtpaı ketýge bolmaıdy. Bul sala úshin naǵyz kerek minez.
Temirjol salasynda 35 jyl úzdiksiz eńbek etip kele jatqan Talǵat Qusaıynov kásibine adaldyǵymen erekshelenedi. Kásibı mereke qarsańynda oǵan «Adal eńbegi úshin» tósbelgisi tabystaldy. Marapat jaıly suralǵanda ol: «Múmkin, eńbegim sińgen shyǵar», – dep qysqa qaıyrdy.
