Sýret: senate.parlam.kz
Halyqaralyq parlamenttik odaqtyń, UN-OHRLLS jáne Túrikmenstan Parlamentiniń qoldaýymen ótken forým barysynda turaqty damýdyń negizgi máseleleri, Avaza is-qımyl baǵdarlamasyn iske asyrýdaǵy parlamentterdiń róli, sondaı-aq óńirlik jáne halyqaralyq áriptestikti nyǵaıtý joldary talqylandy.
Forým qatysýshylary LLDC elderi parlamentteri arasyndaǵy kúsh-jigerdi úılestirýdiń mańyzdylyǵyn atap ótti. Bul eń aldymen, kólik jáne saýda ınfraqurylymyn damytýǵa, eseptilikti qamtamasyz etýge jáne ınstıtýsıonaldyq turaqtylyqty arttyrýǵa baǵyttalǵan zańnamalyq bastamalardy ilgeriletý úshin qajet. Sonymen qatar teńizge shyǵa almaıtyn elderdiń múddelerin kózdeıtin kópjaqty saýda júıesin qalyptastyrý, beıbitshilik pen senimdi nyǵaıtý jáne turaqty damý maqsatynda parlamenttik yntymaqtastyqty kúsheıtý máselelerine de erekshe nazar aýdaryldy.
Forým qorytyndysy boıynsha Avaza is-qımyl baǵdarlamasynyń maqsattaryn júzege asyrýǵa ulttyq parlamentterdiń belsendi qatysýyn jáne yntymaqtastyqtyń negizgi basymdyqtaryn bekitetin Parlamenttik deklarasııa qabyldandy.
Qazaqstan delegasııasynyń mundaı halyqaralyq is-sharalarǵa qatysýy elimizdiń parlamenttik dıplomatııa salasyndaǵy ustanymdaryn odan ári nyǵaıtýǵa, sondaı-aq turaqty damý men óńirlik yntymaqtastyq salalaryndaǵy ulttyq múddelerdi ilgeriletýge yqpal etedi.
Aýyl turǵyndarymen kezdesti
Senat depýtattarynyń óńirlerge sapary da jalǵasyp jatyr. Naýryzbaı Baıqadamov pen Rýslan Rústemov Qyzylorda oblysynyń Jalaǵash aýdanyna baryp, balamaly energetıka salasyndaǵy jobanyń júzege asyrylý barysymen tanysyp, aýyl turǵyndarymen kezdesti.
Senatorlar «Nomad Solar» JShS-nyń kún elektr stansasyna bardy. Nysan 164 gektar aýmaqty alyp jatyr, onyń 75 gektaryna kún panelderi ornatylǵan. Stansa 2019 jyly iske qosylǵan jáne óńirdiń turaqty damýyna úles qosyp, ekologııalyq taza elektr energııasymen qamtamasyz etip keledi.
Parlament músheleri mundaı jobanyń eldiń energetıkalyq táýelsizdigin nyǵaıtyp, ekologııalyq kún tártibin ilgeriletý úshin mańyzy zor ekenin atap ótti. Sondaı-aq «jasyl» energetıkany damytý memlekettik saıasattyń basym baǵyttarynyń biri bolyp qala beretinin jetkizdi.
«Balamaly energetıkany damytý – elimizdiń ekologııalyq maqsattaryna qol jetkizý jáne energetıkalyq qaýipsizdigin nyǵaıtý jolyndaǵy mańyzdy baǵyt. Mundaı jobalar óńirlerdiń turaqty damýyna serpin berip, ekonomıka úshin jańa múmkindikter ashady», dedi R.Rústemov.
Issapar barysynda senatorlar aýyl sharýashylyǵy salasynda eńbek etip júrgen Tań aýylynyń turǵyndarymen de kezdesti. Ashyq dıalog barysynda sýarmaly sýdyń jetispeýshiligi jáne aýyl sharýashylyǵy ónimderin ótkizý máseleleri kóterildi.
