216,8 mlrd teńge kóleminde baǵalanǵan nysannyń qurylysy bıyl 3 naýryzda bastalǵan. Joba tolyq iske qosylǵanda jylyna 900 mıllıon tekshe metr tabıǵı jáne ilespe gaz óndirýge múmkindik beredi. Bul – elimiz úshin strategııalyq mańyzy zor óndiris. Qurylysty 2027 jylǵa deıin aıaqtaý josparlanyp otyr.
Búginde zaýyttyń negizgi irgetasy qalanyp, syrtqy ınjenerlik jeliler tartylǵan. Avtoturaq aýmaǵyna asfalt tóselip, qosalqy stansada jerge tuıyqtaý júıesiniń alǵashqy kezeńi aıaqtaldy. Ýaqytsha elektrmen qamtý jelisi iske qosylyp, avtokólik tarazylary ornatyldy jáne qoıma ınfraqurylymy jabdyqtaldy.
«Jańaózendegi jumys istep turǵan eski Qazaq gaz óńdeý zaýyty 1973 jyly paıdalanýǵa berilgen edi. О́ndiristik qýatty arttyrý maqsatynda salynyp jatqan bul jańa zaýyt suıytylǵan gaz tapshylyǵyn joıady. Nysan qurylys jumystary talapqa saı júrgizilip, belgilengen merzimde aıaqtalýǵa tıis. Bul – bizdiń turaqty baqylaýymyzda bolatyn joba», dedi depýtat Samat Musabaev.
Qazir qurylys alańynda zaýyttyń «Negizgi tehnologııa» bólimine qatysty kúrdeli keshender jumysy atqarylýda.
Mańǵystaý oblysy – elimizdiń ishki naryǵynda tabıǵı gazdyń eń iri tutynýshysy. Sońǵy jyldary óńirdiń ınfraqurylymy qarqyndy damyp, turǵyn úı men áleýmettik nysandar sany kóbeıgen saıyn gazǵa suranys ta artyp keledi. Osyǵan oraı, saılaýaldy baǵdarlama aıasynda uzyndyǵy 506,5 shaqyrym magıstraldyq gaz qubyrlaryn salý kózdelgen. Sonymen qatar, aımaqta óńdeý ónerkásibi salasynda 2,2 myń jańa jumys ornyn ashýǵa múmkindik beretin 26 joba iske asyrylady.
