Eldiń qorǵanys qabiletin arttyrýdyń basty talaby – jaýyngerlerdiń kásibı biliktiligin kóterý men zamanaýı bes qarýyn saılaý. Egemendigi men eldigin baıandy qylýdy maqsat tutqan árbir memleket bul máselege asa sergek qaraıdy. Osy oraıda elimizde 14 tamyz – Jaýyngerlik daıyndyq mamandarynyń kúni atalyp ótedi. Bul – kásibı mereke – ásker áleýetin arttyrýǵa aıryqsha kóńil bólinip otyrǵanynyń bir belgisi.
Jalpy, Qarýly kúshterge qabiletti jaýynger daıarlaý úderisi qalaı júredi jáne neden bastalady? Eń aldymen áskerdiń biliktiligin kóterýdiń alǵashqy «álippesi» – jeke quramdy oqytýdy uıymdastyrý. Jaýyngerlik daıyndyq júıesi bólimsheler men vzvodtardan bastap batalon shtabtary, áskerı bólimder men quramalarǵa deıingi barlyq áskerı bólimshelerdi qamtıdy.
Búginde Qorǵanys mınıstrligi áskerdi sapaly daıarlaý úshin polıgondar men oqý-jattyǵý ortalyqtarynyń ınfraqurylymyn belsendi túrde damytyp jatyr. Zamanaýı mýltımedııalyq synyptarmen, atys jáne tehnıka basqarý trenajerlarymen, avtomattandyrylǵan baǵalaý júıelerimen jabdyqtalǵan jańa oqý-jattyǵý keshenderi boı kóterip keledi.
Jyl saıyn Qarýly kúshterimizdiń qatysýymen 300-den astam iri oqý-jattyǵý ótetinin eske sala keteıik. Olardyń qatarynda «Aıbalta» strategııalyq, «Qarataý», «Batyl toıtarys» sııaqty jedel-taktıkalyq jáne keshendi oqý-jattyǵýlar bar. Bular Qarýly kúshterdiń barlyq túri men ásker tekteriniń ózara is-qımylyn shynaıy jaýyngerlik jaǵdaıǵa barynsha jaqyndatylǵan jaǵdaıda pysyqtaýǵa múmkindik beredi.
Jaýyngerlik daıarlyq júıesine qos maqsatty mamandyqtar boıynsha oqytý da kiredi. Bul mamandyqtar armııada ǵana emes, azamattyq salada da joǵary suranysqa ıe.
Jyl saıyn jaýyngerlik daıyndyq aıasynda 15 myńnan astam kásibı maman – ofıser, serjant, sarbaz jáne tehnıkalyq sarapshy daıarlanyp shyǵady. Bul tásil áskerı kadrlardyń ámbebaptyǵy men olardyń azamattyq ómirdegi básekege qabilettiligin qamtamasyz etedi.
Qorǵanys mınıstrligi júzege asyryp jatqan mańyzdy jobanyń biri – «Sarbaz 2.0» baǵdarlamasy. Atalǵan baǵdarlama aıasynda jaýyngerlik daıyndyqta joǵary nátıje kórsetken áskerı qyzmetshiler ulttyq biryńǵaı testileýsiz jáne emtıhansyz joǵary oqý oryndaryna túsý múmkindigine ıe bolady.
Qazaq armııasyndaǵy jaýyngerlik daıyndyq júıesiniń negizin qalaǵandar qatarynda general-maıorlar Iýrıı Kýrmatov, Damır Halıkov, Nurlan Jolamanov, Asqan Tasbolatov, Almaz Asenov, Talǵat Qoıbaqov, Álimjan Ernııazov, Tımýr Ábishev, Almaz Jumakeev, Dáýlet Ospanov, polkovnıkter Kamıl Ýrmanov, Vladımır Medvedev, Nyshanáli Kúzerbaev, Haırýlla Ilıasov, basqa da esimderi elge belgili áskerı basshylardy ataýǵa bolady. El irgesiniń berik, aspanynyń ashyq bolýy – osyndaı qarymdy qolbasshylar men qabiletti jaýyngerlerdiń arqasy.
Qazirgi tańda Qarýly kúshter Bas shtabynyń Jaýyngerlik daıyndyq departamentin general-maıor Anatolıı Dovganıýk basqarady. Bul sala mamandarynyń tájirıbesi men Otan aldyndaǵy adaldyǵy – armııamyzdyń kez kelgen jaǵdaıda óz boryshyn abyroımen atqara alatynyna kepil.
