Qos komanda arasyndaǵy eki match ta 0:0 esebimen aıaqtaldy. Al sheshýshi sátte «Qaırattyń» qaqpashysy Temirlan Anarbekov sheber oıynymen kózge túsip, úsh penaltıdi qaıtaryp, komandasyna tarıhı jeńis syılady.
Tarıhı jeńis pen qomaqty tabys
Bul jeńis almatylyq klýbqa tek sporttyq jetistik emes, qarjylaı tabys ta ákeldi. Chempıondar lıgasynyń toptyq kezeńine joldama alǵan barlyq klýbtar týrnırdiń aýqymdy júlde qorynan óz úlesin alady.
«Qaırat» kem degende 18,62 mıllıon eýroǵa, ıaǵnı shamamen 11,7 mıllıard teńgege ıe bolady. Buǵan qosymsha, toptyq kezeńdegi ár jeńis úshin — 2,1 mıllıon eýro, teń oıyn úshin — 750 myń eýro kóleminde syıaqy taǵaıyndalǵan.
Salystyra ketsek, Eýrokýboktardyń irikteý kezeńine turaqty qatysyp júrgen qazaqstandyq klýbtardyń jyldyq bıýdjeti 4 mıllıard teńgeden aspaıdy. Demek, bul – otandyq fýtbol úshin eleýli jetistik.
Eýropanyń azýly klýbtarymen oıyn
2025 jyldyń kúzinen bastap 2026 jyldyń qańtaryna deıin «Qaırat» toptyq kezeńde Eýropanyń eń úzdik segiz komandasymen kezdesedi. Jerebe tartý rásimi juma kúni ótedi.
Qarsylastar qatarynda týrnırdiń qazirgi jeńimpazy — Fransııanyń «Parı Sen-Jermeni», álemdegi eń tıtýldy klýb — madrıdtik «Real», Ispanııa chempıony — «Barselona», sondaı-aq APL alyptary — «Lıverpýl», «Manchester Sıtı», «Arsenal» jáne basqa da tanymal klýbtar bolýy múmkin.
Toptyq kezeńdegi segiz matchtyń tórteýi Almatyda ótedi. Chempıondar lıgasyndaǵy negizgi oıyndar 2025 jylǵy 16 qyrkúıek pen 2026 jylǵy 28 qańtar aralyǵynda uıymdastyrylady.
