Foto: Úkimettiń baspasóz qyzmeti
«Samuryq-Qazyna» basshylyǵy dırektorlar keńesine negizgi óndiristik jáne qarjylyq kórsetkishter týraly esep berdi.
Dırektorlar keńesi ekonomıkanyń basym salalaryn qamtıtyn iri ınvestısııalyq jobalardyń júzege asyrylý barysy týraly aqparatty tyńdady.
«Nátıjesinde 6 jobany qosý arqyly jobalar tizbesin 52-ge deıin keńeıtý týraly sheshim qabyldandy. Osylaısha, búginde 30 joba boıynsha ERS-kelisimsharttar, onyń ishinde, 24 joba boıynsha qurylys-montajdaý jumystary júrgizilýde, 4 joba iske qosyldy, 11 joba ınvestısııa aldyndaǵy kezeńde, 11 joba jobalaý kezeńinde tur. Iri jobalar boıynsha qarajatty ıgerý 101%-dy, jergilikti qamtý úlesi – 273 mlrd teńgeni qurady. Energetıka salasynda Kókshetaý JEO qurylysy bastaldy, №3 energııa blogyn ornata otyryp, Ekibastuz GRES-2 keńeıtý boıynsha qurylys-montajdaý jumystary bastaldy. Sondaı-aq Almatydaǵy JEO-2-de jańǵyrtý jumystary jalǵasýda, munda birinshi gaz týrbınasyn ornatý aıaqtalǵan. Munaı-gaz salasynda gaz bólý keshenin salýǵa kelisimshartqa qol qoıyldy, sondaı-aq Kendirli kentinde teńiz sýyn tushytý boıynsha alǵashqy óndiristik jeli iske qosyldy», dep habarlady Úkimettiń baspasóz qyzmeti.
Aıta keteıik, kólik-logıstıkalyq ınfraqurylymdy damytý sheńberinde Baqty-Aıagóz temirjol jelisiniń qurylysy júrgizilip jatyr, Kaspıı teńiziniń túbimen talshyqty-optıkalyq baılanys jelisin tartý boıynsha teńiz izdenisteri bastaldy.
«Bıyl Caspi Bitum zaýytynyń qýatyn keńeıtý jáne ZHETYSU konteınerlik termınalynyń qurylysy sııaqty jobalar aıaqtaldy. Kendirli qalasynda sý tushytý zaýytynyń sý taratý qondyrǵysy iske qosylyp, Jańaózen qalasynyń ortalyq sýmen jabdyqtaý torabyna sý berile bastaldy. Aıaqtalýy bıylǵa josparlanǵan birqatar jobany júzege asyrý jalǵasady. «Dostyq – Moıynty» temirjol jelisiniń ekinshi joldarynda poıyz qozǵalysy ishinara iske qosyldy, Aqtaý portynda konteınerlik hab jumysyn bastady, «Taldyqorǵan–Úsharal» magıstraldy gaz qubyrynyń jelilik bóligi aıaqtaldy, Almaty aınalma temirjol jelisiniń qurylysy jalǵasyp jatyr», delingen habarlamada.
Jalpy qordyń 2025 jyldyń 7 aıyndaǵy kirisi men EBITDA boıynsha naqty mánderi josparlanǵannan tıisinshe 6% jáne 15%-ǵa asyp túsken.
Dırektorlar keńesiniń múshelerine sondaı-aq ǵylymı-zertteý jáne tájirıbelik-konstrýktorlyq jumystardy (ǴZTKJ) damytý jáne Qor tobynyń kompanııalarynda jasandy ıntellektti engizý týraly aqparat usynyldy. Búgingi tańda ǴZTKJ-nyń eki jobasy iske asyryldy: Qyzylorda oblysyndaǵy «Aqshabulaq» ken ornynda ilespe gazdy qaıta óńdeý boıynsha, ol qaıta óńdeý kólemin 33%-ǵa ulǵaıtady; belsendirilgen alıýmınıdiń keshendi reagentteri jobasy, sonyń arqasynda sý daıyndaý kezinde sýdyń buldyrlyǵyn tómendetý tıimdiligi 99%-ǵa jetedi.
Sonymen qatar qarjylandyrý kózderin ártaraptandyrý aıasynda Qordyń dırektorlar keńesi QHR naryǵynda panda-oblıgasııalardyń debıýttik shyǵarylymy arqyly syrtqy qaryz alýdy maquldady.
Otyrys qorytyndysy boıynsha «Samuryq-Qazyna» basshylyǵyna ınvestısııalyq jobalardyń ýaqtyly júzege asyrylýyn qamtamasyz etý, qurylys-montajdaý jumystarynyń sapasyna jáne nysandardy iske qosý kestesiniń saqtalýyna baqylaýdy kúsheıtý tapsyryldy.
