Ekoaksııa ortalyq alańnan bastalyp, qatysýshylardy Jańaózen qalasynyń ákimi Janseıit Qaınarbaev quttyqtap, qala tazalyǵyna úles qosýǵa shaqyrdy. Ákim ózi de qolǵap kıip, turǵyndarmen birge tazalyq jumystaryna belsene atsalysty.
Sharaǵa Mańǵystaý oblystyq ekologııa departamentiniń basshysy Armat Júsipqalıev, Zangar Event qoǵamdyq qorynyń basshysy Nurjan Muhammedov, sondaı-aq elimizge tanymal eko-bloger Dýlat Nabıev arnaıy kelip, halyqpen birge eńbek etti. Olar ekologııalyq mádenıetti damytý men turmystyq qaldyqtardy durys suryptaý jóninde oı bólisti.
Ekoaksııaǵa qaladaǵy óndiristik kásiporyndar, memlekettik jáne kommýnaldyq mekemeler, aýyldar, mektepter men balabaqshalar, densaýlyq saqtaý uıymdary, jastar uıymdary men eriktiler túgelge jýyq qatysty. Qatysýshylarǵa aldyn ala belgilengen aýmaqtar bólinip, qoqys jınaý, sanıtarlyq tazalaý jáne kógaldandyrý jumystary júrgizildi.
Shara barysynda 40-qa jýyq tehnıka jumyldyrylyp, 300 tonnadaı qoqys shyǵaryldy.
Bul aýqymdy ekoaksııa Jańaózen turǵyndarynyń aýyzbirshiligin aıqyn kórsetip, qalanyń ekologııalyq damýyna jańa serpin berdi.
Ekoaksııany uıymdastyrýǵa Zangar Event qoǵamdyq qory atsalysty.
Ekoaksııany túsirý úshin respýblıkalyq telearnalardyń tilshileri keldi.
