«Baıqonys aýylynda ashylǵan jańa mektep Memleket basshysynyń apatty jáne úsh aýysymdy mektepterdi azaıtý tapsyrmasy aıasynda iske asty», deıdi oblystyq basqarmasynyń basshysy Eldos Safýllın.
Jańa mektep zamanaýı bilim berý talaptaryna tolyqtaı saı keledi. Munda STEM, robototehnıka, vızýaldy dızaın, horeografııa kabınetteri, erekshe bilimdi qajet etetin balalarǵa arnalǵan sensorlyq jáne ınklıýzıvti kabınetter, keń de jaryq oqý bólmeleri, sport jáne akt zaldary qamtylǵan.
Buryn Trekın, qazir Baıqonys atalatyn bul aýylda alǵashqy qazaq mektebi 1998 jyly ashylǵan bolatyn. Bastapqyda mektep tabaldyryǵyn 62 oqýshy attasa, oralǵa 11 pedagog sabaq berdi. 2007 jyly mektep eki qabatty jańa ǵımaratqa kóshti. Az ýaqytta erekshe jetistikterimen kózge túsken mektep ujymy 2018 jyly halyqaralyq IýNESKO klýbtarynyń qataryna endi. 2021 jyldan beri aqyn Qadyr Myrza Áli esimin ıelengen orta mektep bıyl sý jańa «Keleshek mektep» ǵımaratyna kóship otyr.
Jańa ǵımarat 600 orynǵa eseptelgen, jalpy quny – 4,9 mlrd teńge, munda 33 oqý kabıneti bar. Kabınettiń barlyǵy ınteraktıvti taqtamen jabdyqtalǵan. Sonymen qatar, tıisti quraldarmen jabdyqtalǵan beıneleý óneri, grafıka jáne jobalaý, dızaın jáne tehnologııa, tamaqtaný mádenıeti, úı mádenıeti, ınformatıka kabınetteri, 2 sportzal, kitaphana, 138 oryndyq akt zaly, 176 oryndyq ashanasy bar. Mektep aýlasynda balalar oıyn alańy, fýtbol, basketbol, júgirý joldary alańdary bar. Bıylǵy oqý jylynda mekteptegi 24 synyptaǵy 510 oqýshy túske deıin, 4 synyptaǵy 70 oqýshy ekinshi aýysymda bilim alady. Oqytý qazaq tilinde júredi. Bıyl birinshi synypqa 50 oqýshy, mektepaldy daıarlyq synybyna 47 bala qabyldanǵan.
