Foto: Mańǵystaý oblysynyń ákimdigi
Jańa bilim oshaqtarynyń biri – Beıneý aýdany Sam aýylyndaǵy 300 oryndyq mektep. Ashylý rásimine oblys ákimi Nurdáýlet Qılybaı, ardagerler, ustazdar men aýyl turǵyndary qatysty. Saltanatty jıynda óńir basshysy jınalǵandardy bilim kúnimen quttyqtap, jańa mektepterdiń óńir úshin mańyzdylyǵyna toqtaldy.
«Memleket basshysy bilim salasyn damytýǵa árqashan aıryqsha kóńil bóledi. Búgin paıdalanýǵa berilip otyrǵan jańa mektepter – osy qamqorlyqtyń naqty nátıjesi. Prezıdenttiń tapsyrmasymen salynǵan zamanaýı bilim ordalary shalǵaıda jatqan aýyldarǵa da jetip, balalardyń sapaly bilim alýyna múmkindik berip otyr. Bul bilim ordasynda shákirtterdiń jan-jaqty damýyna, muǵalimderdiń shyǵarmashylyqpen eńbek etýine barlyq jaǵdaı jasalǵan. Osy shańyraqtan túlep ushatyn túlekter elimizdiń damýyna úles qosatyn bilimdi de otanshyl azamat bolady dep senemin. Barshańyzdy bilim kúnimen quttyqtaımyn, jańa oqý jyly sátti ári tabysty bolsyn», dedi Nurdáýlet Qılybaı.
Sam aýylyndaǵy jańa mektepte qazirgi tańda 151 oqýshy bilim alady, 40 pedagog eńbek etedi. Mektep 27 oqý kabınetimen, 18 qosymsha bólmemen, sondaı-aq hımııa, bıologııa, ınformatıka, robototehnıka, STEM, óner jáne mýzyka synyptarymen qamtylǵan. Budan bólek, logoped pen psıholog kabınetteri, sport jáne akt zaly, ashana, kitaphana, sheberhana, medısınalyq bólme jáne murajaı bar.
Sonymen qatar jańa oqý jyly qarsańynda Aqtaý qalasynyń «Raýan» shaǵyn aýdanynda – 300 oryndyq, Munaıly aýdanynyń Batyr aýylyndaǵy «Samal» shaǵyn aýdanynda – 1200 oryndyq, Beıneý aýylynda – 600 oryndyq jáne Túpqaraǵan aýdanynyń Saıyn-Shapaǵatov aýylynda demeýshilerdiń qoldaýymen 1200 oryndyq mektep ashyldy. Bul nysandardyń iske qosylýy Munaıly men Túpqaraǵan aýdandarynda úsh aýysymdy oqytýdy tolyq joıyp, Beıneý aýdanyndaǵy apatty mekteptiń máselesin sheshti.
Jańa oqý jylynda Mańǵystaý oblysynda 157 mektep jumysyn bastady. О́ńirde 213 myńnan astam oqýshy bilim alýda. Olardyń ishinde 19 myń bala alǵash ret mektep tabaldyryǵyn attady. Sonymen birge oqý jylynyń alǵashqy toqsanynda taǵy bes jańa mektep paıdalanýǵa beriledi.
