Foto: baq.kz
Kanıkýldan oralǵan májilismenderdiń alǵashqy jalpy otyrysynda «Qazaqstan Respýblıkasyndaǵy saılaý týraly» Konstıtýsııalyq zańǵa jáne Ákimshilik quqyq buzýshylyq týraly kodekske saılaýdy jetildirý máseleleri jónindegi ilespe túzetýler:
– 2026-2028 jyldarǵa arnalǵan respýblıkalyq bıýdjet týraly;
– respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2026-2028 jyldarǵa arnalǵan jalpy sıpattaǵy transfertterdiń kólemi týraly;
– Sıfrlyq kodeks jobasy men oǵan ilespe túzetýler;
– «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańǵa engiziletin túzetýler;
– Qyrǵyzstanmen jáne Marokkomen birqatar halyqaralyq shartty ratıfıkasııalaý týraly zań jobalaryn jumysqa alǵany habarlandy.
Májilistiń jalpy otyrysynan keıin depýtattardan VIII shaqyrylymy tórtinshi sessııasynda qandaı máselelerdiń sheshimin tabýdy kózdep kelgenin surap, bildik.
Elnur Beısenov, QR Parlamenti Májilisiniń Áleýmettik-mádenı damý komıtetiniń múshesi:
«Aýyl azamattaryn alańdatyp otyrǵan – ınflıasııa máselesi. Onyń bir ushy aýyldyqtardyń tabys kózine baryp tireledi. Biz osy taqyrypty Úkimettiń aldyna qoıamyz. Sonymen birge elimizde 800 myńǵa jýyq azamat saıajaılarda turyp jatyr. Olar Keńes kezeńindegideı saıajaılardy ekinshi úı retinde paıdalanbaıdy. Qara domalaqtardyń negizgi turaqty úıine aınalǵan. Saıajaı bolǵandyqtan qoldanystaǵy zań aıasynda onda mektep ne jol salyp, sý júrgize almaımyz. Osy máseleni retteý maqsatynda zań jobasyn daıyndap jatyrmyz. Týrızmdi damytý jaıy da qozǵalýy tıis. Bıyl ózim Alakól, Balqashqa baryp, el óńirlerin aralap, halyqpen kezdestim. Otbasymyzben tabıǵatqa shyqtyq. Rasynda da áli de pysyqtaıtyn tustar bar. Biz kóbine jeke kásipkerlerge mindetteýge tyrysamyz. Bul turǵyda Úkimet te ınfraqurylymdy damytý, shekaralardy bekitý syndy jumystarǵa nazar aýdarý kerek. О́zge de ózekti máselelerdi fraksııa, Májilis atynan Prezıdentke usyndyq. Olardyń birshamasy aldaǵy Joldaý aıasynda qoldaý tabady dep senemiz», dedi depýtat.
Aıtýar Qoshmambetov, QR Parlamenti Májilisiniń Ekonomıkalyq reforma jáne óńirlik damý komıtetiniń múshesi:
«Májilistegi «Respublica» partııasynyń 6 múshesi 20 aımaqty aralady. Meniń ózim 5 aımaqty qamtydym. Bizdiń partııa basym nazardy kásipkerlik, áleýmettik kásipkerlik pen bilim berý, densaýlyq saqtaý salasyna salady. Sondaı-aq týrızm, aýyl sharýashylyǵy, kreatıvti ındýstırııa salalarynyń da kúrmeýli tusyn sheshýge den qoıamyz. Búgin óndirýshilerdi tolǵandyryp otyrǵan máselelerdi depýtattyq saýalymda kóterdim. Jospar boıynsha máselelerdi jyl boıy ortaǵa salamyz», dedi ol.
Maksım Rojın, QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń múshesi:
«Jyldan jylǵa negizgi máseleler ózgermeıdi. Ol ınfraqurylym, mektep, sý, jol máselesi. Men osy joly Almaty oblysynda boldym. Sonda kórgen sheshimin kútetin jaılar Májilis qabyrǵasynda kóteriledi», dedi Maksım Nıkolaevıch.
Bolatbek Najmetdınuly, QR Parlamenti Májilisiniń Ekonomıkalyq reforma jáne óńirlik damý komıtetiniń múshesi:
«О́ńirlerdi aralap, halyqpen de kezdestik. Kókeıindegi máselelerge qulaq túrdik. Sondaı-aq, biz 2023 jyly naýryz aıynyń sońynan bastap Májilis qabyrǵasyndamyz. Sol kezden bastap sheshimin áli de kútip turǵan saýaldardy sońyna deıin jetkizgimiz keledi. Kúzdik sessııada Salyq kodeksi boıynsha, aýyl sharýashylyǵy men óndiris, qurylys salasy men Ádilet mınıstrligine qatysty máselelerdi tarazylaýǵa ún qospaqpyn. Sonyń ishinde zańger konsýltanttar men jeke sot oryndaýshylar, palatalar boıynsha keı erejelerdi qatańdatý, jaýapkershiligin kúsheıtýdi usynamyn. Qazir bıýdjette defısıt ekeni belgili. Sol qarjyny tıimdi paıdalaný boıynsha biraz jumysty eńserýdi josparlap otyrmyz», dedi májilismen.
О́tken saıası kezeńde Májilis 106 zań jobasyn qarap, 37 zańdy qabyldaǵan. Onyń ishinde 19 zańǵa Prezıdent qol qoıǵan bolatyn. Tómengi palata depýtattary osy joly da sheshimin kútetin máseleler nazardan tys qalmaıtynyn atap ótti.
