Kórmege Jańaarqa men Ulytaý aýdanynan, sondaı-aq Jezqazǵan, Sátbaev, Qarajal qalalarynan aýyl sharýashylyǵy taýaryn óndirýshiler qatysty. Olar et pen sút ónimderin, ártúrli úı jaǵdaıynda daıyndalǵan shujyq túrlerin, qymyz, qurt, irimshik, tabıǵı jún men kıizden jasalǵan biregeı buıymdardy, bylǵarydan jasalǵan qolóner týyndylaryn, qoı júninen jasalǵan sýretter men kóne tásilmen daıyndalǵan qamshylardy tanystyrdy.
«Bir aýyl – bir ónim» jobasy belgili bir aımaqtyń biregeı ónimin taýyp, ony naǵyz jergilikti brendke aınaldyrýda oblys tarapynan qoldaýǵa ıe bolyp keledi. Kásipkerler – aımaqtyń maqtanyshyna aınalǵan erekshe ónimniń ıesi. Ár taýar tek sapasymen emes, tarıhymen, dástúrimen, júrek jylýymen qundy», dedi Ulytaý oblysy ákiminiń orynbasary Jánibek Nópirov.
Brend-komıtet músheleri ónimderdi baǵalaýda olardyń tabıǵı quramyn, qaptamanyń germetıkalyǵyn, brendtelý deńgeıi men bezendirilýiniń tartymdylyǵyn, sondaı-aq sanıtarlyq talaptarǵa sáıkestigin eskerdi.
«Aýyl sharýashylyǵy ónimderiniń basty artyqshylyǵy – tabıǵı quramynda boıaǵyshtar men konservanttardyń bolmaýy. Sol sebepti, halyqtyń densaýlyǵyna paıdasy zor», deıdi oblystyq kásipkerler palatasynyń dırektory Gúlmıra Qajenova.
Jobada et óńdeý baǵytynda jumys isteıtin «Darkenova» JK (Sátbaev qalasy) ıesi Madına Darkenova, qymyz jáne qymyzdan jasalǵan balmuzdaq óndirisin óristetip otyrǵan «Jańaarqa qymyzy» JK (Jańaarqa aýdany) ıesi Aıtbaı Qasymov jáne bylǵary óńdep, qamshy jasaıtyn «Qaldybaev E» JK (Jańaarqa aýdany) ıesi Ertaı Qaldybaev jeńimpaz atandy. Endi olar respýblıkalyq baıqaýda oblys namysyn qorǵaıdy. Sonymen qatar 5 mln teńge kólemindegi grantqa úmitker atanady. О́zge qatysýshylar alǵys hattarmen marapattaldy.
Ulytaý oblysy
