Máýlen Áshimbaev Mońǵolııa Qazaqstannyń óńirdegi senimdi jáne mańyzdy seriktesi ekenin aıtyp, elderimizdi tereńnen tamyr tartatyn ortaq dástúrler men mádenı-tarıhı mura baılanystyratynyn atap ótti. Sondaı-aq ol Qazaqstan men Mońǵolııa arasyndaǵy yntymaqtastyq memleket basshylarynyń erik-jigeriniń arqasynda ózara qurmet pen senim rýhynda damyp kele jatqanyna nazar aýdardy.
Suhbat kezinde qalyptasqan qarym-qatynasty arttyrý jolynda parlamentaralyq dıalogti nyǵaıtýdyń mańyzy jáne osy baǵyttaǵy mindetter keńinen sóz boldy. Atap aıtqanda, «Qazaqstan-Mońǵolııa» parlamenttik dostyq toby aıasynda salalyq komıtetterdiń yntymaqtastyǵyn keńeıtý máselesine basa mán berildi.
«Eki eldiń Memleket basshylary arasyndaǵy qurmet pen senimge negizdelgen qarym-qatynas Qazaqstan men Mońǵolııa yntymaqtastyǵyn odan ári nyǵaıtýǵa úlken yqpalyn tıgizip keledi. Qazaqstan Prezıdenti Qasym-Jomart Toqaevtyń 2024 jyly Mońǵolııaǵa jasaǵan memlekettik sapary barysynda Strategııalyq áriptestik ornatý týraly birlesken deklarasııaǵa, sondaı-aq mańyzdy úkimetaralyq jáne vedomstvoaralyq qujattarǵa qol qoıyldy. Osy oraıda biz joǵary deńgeıde qol jetkizilgen ýaǵdalastyqtardy iske asyrýǵa yqpal etý, parlamentaralyq baılanystardy nyǵaıtý jáne zań shyǵarý qyzmetinde tájirıbe almasý úshin Mońǵolııanyń Uly Memlekettik Hýralymen yntymaqtastyqty odan ári tereńdetýge múddelimiz», deı kele, M.Áshimbaev Mońǵolııa delegasııasyn Uly Memlekettik Hýraldyń 35 jyldyq mereıli belesimen quttyqtady.
Sonymen qatar Senat tóraǵasy Memleket basshysynyń bastamasymen elimizde júrgizilip jatqan saıası jáne ekonomıkalyq reformalarǵa, sondaı-aq palatanyń olardy zańnamalyq turǵyda qamtamasyz etý baǵytyndaǵy qyzmetine toqtalyp ótti.
Máýlen Áshimbaev rýhanı dıplomatııany damytýdyń mańyzyna da nazar aýdardy. Ol Álemdik jáne dástúrli dinder lıderleri seziniń maqsat-múddelerin belsendi qoldap, oǵan eleýli úles qosqany úshin Mońǵolııanyń rýhanı kóshbasshylaryna rızashylyǵyn bildirdi.
О́z kezeginde Dashzegvıın Amarbaıasgalan Qazaqstanda júrgizilip jatqan qoǵamdyq-saıası jańǵyrýlarǵa joǵary baǵa berip, parlamentaralyq ózara is-qımyldy nyǵaıtýǵa jáne ekijaqty qarym-qatynastyń sharttyq-quqyqtyq bazasyn keńeıtýge múddeli ekenin tilge tıek etti. Sondaı-aq ol Qazaqstannyń jahandyq syn-qaterlerdi eńserý úshin rýhanı dıplomatııany ilgeriletý baǵytynda qolǵa alǵan qadamdary erekshe mánge ıe ekenin aıtty.
Kezdesý barysynda taraptar saýda-ekonomıkalyq jáne ınvestısııalyq yntymaqtastyqty arttyrý máselesine de kóńil bóldi. Ornyqty damý maqsattaryna qol jetkizý, aýyl sharýashylyǵy, taý-ken metallýrgııa kesheni, zamanaýı tehnologııalar, ǵaryshty ıgerý jáne basqa da salalardaǵy birlesken jobalardy iske asyrý tetikteri talqylandy. Odan bólek, suhbat kezinde halyqaralyq jáne óńirlik kún tártibindegi ózekti máseleler áńgimege arqaý boldy.
