Is-sharanyń mártebeli qonaǵy retinde Túrkııa Respýblıkasynyń Prezıdenti Rejep Taıyp Erdoǵan qatysty. Ol Ulttyq ulannyń leıtenanty Ashat Sultanahmetke Akademııa dıplomyn óz qolymen tabystady. Bul oqıǵa Qazaqstan men Túrkııa arasyndaǵy yntymaqtastyqtyń aıqyn kórinisi boldy.
«Osydan bes jyl buryn Ulttyq ulan Akademııasynan Túrkııa memleketiniń Ankara qalasyndaǵy Jandarmerııa akademııasyna oqýǵa túsken bolatynmyn. Mine, bıyl sol oqý ornyn sátti aıaqtap, Túrkııa Prezıdenti Erdoǵan myrzanyń óz qolynan dıplom alyp jatyrmyn. Bul úlken abyroı ári úlken jaýapkershilik. Bizge shet elde shyńdalýǵa múmkindik bergen quqyqtyq tártip áskerine alǵysym sheksiz. Baýyrlas elden alǵan bilimimiz ben tájirıbemiz aldaǵy ýaqytta elge qyzmet jolynda oń áserin tıgizedi dep senemin. О́z eli men jerine qyzmet etý – ár er azamattyń boryshy, sondyqtan áskerı salany sanaly túrde tańdadym», deıdi jas ofıser.
Túrkııa tarapynyń resmı shaqyrýy boıynsha saltanatty rásimge elimizdiń quqyqtyq tártip áskerinen arnaıy delegasııa qatysty. Delegasııany Ishki ister mınıstriniń orynbasary – Ulttyq ulannyń Bas qolbasshysy general-maıor Ańsaǵan Baltabekov bastap bardy.
Sapar barysynda qazaqstandyq ókilder Jandarmerııa jáne jaǵalaý kúzeti akademııasynyń jeke quramdy daıarlaý júıesimen jáne zamanaýı áskerı bilim berý ádistemelerimen tanysty. Sonymen qatar delegasııa Jandarmerııanyń Logıstıka qolbasshylyǵynda, arnaıy maqsattaǵy JÖAK bólimshesiniń oqý ortalyǵynda, sondaı-aq baılanys elektrondyq júıeleri men aqparattyq júıelerdi basqarý ortalyǵyn kórdi.
Sapar barysynda Ańsaǵan Skendiruly Jandarmerııanyń Bas qolbasshysy armııa generaly Alı Chardakchymen kezdesti.
Ulttyq ulannyń Bas qolbasshysynyń Túrkııaǵa sapary áskerı saladaǵy ekijaqty yntymaqtastyqty damytýdaǵy mańyzdy qadam.
Bul sapar tájirıbe almasýǵa, kásibı baılanystardy nyǵaıtýǵa jáne Qazaqstan Respýblıkasy Ulttyq ulany men Túrkııa Jandarmerııasy arasyndaǵy ózara is-qımyldy odan ári nyǵaıtýǵa jol ashty.
