Dıas Esdáýletovtiń aıtýynsha, «Jumysshy mamandyqtar jyly» aıasynda oblystaǵy kadr tapshylyǵyn joıý úshin «О́ńirlik jańa mamandyqtar atlasy» ázirlendi. Sonyń nátıjesinde 11 kolledjde 14 jańa mamandyq ashyldy. Sondaı-aq Taldyqorǵanda halyqaralyq talaptarǵa saı «Zhetysu Skills» ortalyǵy salynyp jatyr. Bul ortalyq stýdentterdi 12 baǵyt boıynsha «WorldSkills» chempıonattaryna kásibı daıarlaýǵa múmkindik beredi.
Orta bilim berý salasynda da aýqymdy jumystar júrgizilýde. «Keleshek mektepteri» baǵdarlamasy aıasynda jańa mektepterdiń qurylysy qatar, qoldanystaǵy bilim mekemelerin kúrdeli jóndeý jáne zamanaýı qural-jabdyqtarmen jabdyqtaý jumystary qolǵa alynǵan. Al bastaýysh synyp oqýshylary úshin tegin tamaqtaný júıesi jolǵa qoıylyp otyr.
Mektepke deıingi bilim berý salasynda bıylǵy mamyr aıynan bastap Taldyqorǵandaǵy barlyq balabaqshalar vaýcherlik qarjylandyrýǵa kóshti. Bul júıe qarjynyń ashyq bólinýin qamtamasyz etip, ata-analar úshin balalaryn kezekke qoıý nemese balabaqsha aýystyrý isinde qolaılylyq týǵyzdy.
Buqaralyq jáne kásibı sportty damytý da nazardan tys qalǵan joq. Sońǵy úsh jylda oblysta 32 jańa sport kesheni salynyp, turaqty túrde sportpen shuǵyldanatyn turǵyndardyń úlesi 42 paıyzǵa jetti. Oblys boıynsha 29 sport túri negizgi baǵyt retinde belgilengen: onyń ishinde 11 olımpıadalyq, 2 paralımpıadalyq jáne 13 ulttyq sport túri bar.
Buqaralyq sportty qoldaýdyń tabysty jobalarynyń biri – «J-LEAGUE» týrnırleri. Basketbol, voleıbol jáne fýtboldan ótetin bul doda jaqyn kúnderi jańa maýsymyn bastamaq.
Baspasóz máslıhaty sońynda Dıas Esdáýletov jýrnalısterdiń suraqtaryna jaýap berip, óńirdegi adamı kapıtaldy damytýǵa baǵyttalǵan sharalardyń jalǵasa beretinin atap ótti.
