Parlament Senatynyń Tóraǵasy, Sezd Hatshylyǵynyń Basshysy Máýlen Áshimbaev Álemdik jáne dástúrli dinder lıderleriniń VIII sezi qarsańynda Qogam News jobasyna suhbat berdi. Onda Palata Spıkeri Qazaqstan Prezıdenti Qasym-Jomart Toqaevtyń «Beıbitshilik jolyndaǵy jańa qozǵalys» qalyptastyrý jónindegi bastamasy aldaǵy forýmda negizgi taqyryptardyń biri bolatynyn atap ótti.
Senat Tóraǵasynyń aıtýynsha, bul ıdeıa álemde qaqtyǵystardy toqtatý jáne jer júziniń ár aımaǵyndaǵy zorlyq-zombylyq deńgeıin tómendetý jolynda kúsh biriktirýdiń mańyzdy ekenin kórsetedi. Haos pen turaqsyzdyq qalypty jaǵdaıǵa aınalǵan qazirgi kezeńde rýhanı kóshbasshylar ǵana álemde izgilikti ilgeriletý jáne qaqtyǵystardy beıbit jolmen sheshý isinde mańyzdy ról atqara alady.
«Bul halyqaralyq qaýymdastyq úshin der kezinde qolǵa alynǵan asa mańyzdy forým bolady. Qazirgi álemge ózgeris engizý úshin is júzinde qandaı da bir qadamdar qajet. Prezıdentimiz Qasym-Jomart Kemeluly Toqaev osy kókeıkesti máseleni kóterdi jáne biz «Beıbitshilik jolyndaǵy jańa qozǵalys» ıdeıasy VIII Sezd aıasynda negizgi taqyryptardyń biri bolady dep senemiz», – dedi Máýlen Áshimbaev.
