Sýret: qaragandyhabary.kz
Ortalyq kommýnıkasııalar qyzmeti alańynda ótken brıfıngte IIM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov jyl basynan beri 8 aıdyń ishinde eldegi esirtki qylmystarynyń sany 2,8%-ǵa artqanyn aıtty. Tárkilengen esirtki zattarynyń kólemi eki esege ósip, 13,5 tonnany quraǵan. Onyń ishinde sıntetıkalyq esirtkiniń úlesi – 1,1 tonna.
«Tártip saqshylarynyń qyraǵy qyzmetiniń arqasynda 7 mln-nan asa doza esirtki zaty zańsyz aınalymǵa jiberilmedi. 105 jasyryn esirtki zerthanasy joıyldy. Olardyń 12-si sıntetıkalyq esirtki óndirýmen aınalysqan. Mysaly, mamyr aıynda Almaty oblysynda sıntetıka óndirgen zerthananyń qyzmeti toqtatylyp, bir sheteldik azamat ustalyp, 140 kılodan asa daıyn ónim men 8 tonna hımııalyq zat tárkilendi. Bul zattardan 4 tonna sıntetıkalyq esirtki daıyndaý josparlanǵan», dedi ol.
IIM dereginshe, «Qarasora-2025» keń aýqymdy operasııasy jyl saıyn jaz-kúz mezgilinde, atap aıtqanda, 1 maýsymnan 31 qazanǵa deıin ótedi. Ásirese quramynda esirtkisi bar ósimdikter ósetin ońtústik aımaqtarǵa mán beriledi. Operasııa barysynda qarasora ósirý, jınaý men tasymaldaýǵa qarsy áreket etý, esirtki taratýmen aınalysatyn uıymdasqan qylmystyq toptardyń jolyn kesý sekildi mindetter oryndalady.
«Internet jelisindegi esirtki qylmystaryn anyqtaý boıynsha júıeli jumys júrgizilip jatyr. Jasandy ıntellekt negizinde ınternet keńistigin baqylaýǵa arnalǵan aqparattyq júıeler iske qosyldy. Jetekshi IT-kompanııalar men qoǵamdyq uıymdarynyń mamandary tartylyp, esirtki saıttary anyqtalyp, «Kıberbaqylaý» júıesi arqyly buǵattaý úshin Mádenıet jáne aqparat mınıstrligine joldanady. Osy jyly esirtki satýmen baılanysy bar 23 myńnan asa resýrs anyqtaldy», dedi Q.Áljanov.
Sonymen qatar esirtki bıznesinde paıdalanylǵan 44 myńnan asa kartalyq shot buǵattalyp, 2,5 mlrd teńge kólemindegi qarajatqa tosqaýyl qoıylǵanyn jetkizdi.
Búginde «Qarasora-2025» operasııasy Jambyl, Qyzylorda, Aqtóbe, Ulytaý, Túrkistan, Almaty, Jetisý oblystarynda belsendi ótip jatyr.
«Buǵan qosa 2026–2028 jyldarǵa arnalǵan nashaqorlyq pen esirtki bıznesine qarsy kúrestiń Keshendi jospary ázirlenip jatqanyna nazarlaryńyzdy aýdarǵym keledi. Bul – 2016 jyldan beri ekinshi ret ázirlenip otyrǵan baǵdarlamalyq qujat. Ol esirtkige qarsy qyzmettiń barlyq baǵytyn qamtıdy jáne oǵan memlekettik, jergilikti atqarýshy organdar men úkimettik emes sektor ókilderi tartylyp jatyr», dedi IIM ókili.
