«Memlekettiń kóz aldyndaǵydan basqany kórmeı, bárine kóne beretin áleýmettik saıasaty júzden astam túrli jeńildiktiń paıda bolýyna ákep soqtyrdy. Osy jeńildikterdi áperemin dep «kómek qolyn» sozatyn jylpostar da kóbeıdi», dedi Prezıdent.
Memleket basshysy KSRO ydyraǵanyna 35 jyl ótse de, túrli qaqtyǵystarǵa qatysqan azamattarǵa arnalǵan tólemder men jeńildikterdiń áli jalǵasyp kele jatqanyn synǵa aldy.
Qasym-Jomart Toqaev áleýmettik tólemderdi qoldan kóbeıtý – eldiń damý qarjysyn bosqa shashý ekenin atap ótti. Onyń aıtýynsha, mektep, aýrýhana jáne ınfraqurylym salýǵa baǵyttalýy tıis qomaqty qarajat áleýmettik jeńildikterge artyq jumsalyp jatyr.
Memleket basshysy kezinde engizilgen «tolyq emes otbasy» sanatynyń ajyrasýlardyń kúrt ósýine yqpal etkenin mysalǵa keltirip, mundaı qadamdardyń qoǵamǵa zııan tıgizgenin aıtty.
«Áleýmettik salada ońtaıly sheshim qabyldaýdyń ornyna, Úkimet keminde 15 jyl boıy áleýmettik masyldyq pen áleýmettik alaıaqtyqqa jol berip keldi», dedi ol.
Sonymen qatar Prezıdent demografııalyq úrdisterdi tereń zertteý qajettigin atap ótip, Strategııalyq josparlaý jáne reformalar agenttiginiń bazasynda jasandy ıntellektini qoldanatyn Demografııalyq úderisterdi taldaý jáne boljaý ortalyǵyn qurýdy usyndy.
Memleket basshysy zeınetaqy júıesine de toqtaldy. Onyń aıtýynsha, óz-ózin jumyspen qamtyǵan azamattardyń basym bóliginde jınaq az, bul júıeniń bolashaǵyna qaýip tóndiredi. Sondyqtan Úkimetke, Ulttyq bankke jáne Strategııalyq josparlaý agenttigine zeınetaqy júıesiniń qarjylyq turaqtylyǵyn qamtamasyz etý jóninde naqty sharalar ázirleý tapsyryldy.
Prezıdent sondaı-aq azamattardyń qarjylyq saýattylyǵyn arttyrýdyń mańyzdylyǵyn aıtyp, «AMANAT» partııasy usynyp otyrǵan «Qaryzsyz qoǵam» jobasyn jalǵastyrý qajettigin atap ótti. Onyń aıasynda ótken jyly 845 myń adam keńes alyp, qarjylyq bilimin jetildirgen.
«Túpki maqsat – halyqtyń moınyndaǵy qaryzyn azaıtý ǵana emes, azamattardyń tabysy turaqty bolýyn qamtamasyz etý», dedi Qasym-Jomart Toqaev.
