Kompanııanyń basqarma tóraǵasy Ashat Hasenov Atyraý munaı óńdeý zaýytynyń josparly aldyn alý jumystaryna daıyndyǵyn tekserdi. Atalǵan kezeńde zaýyttaǵy qysymmen jumys isteıtin 1174 ydys pen apparatqa, 46 peshke, tehnologııalyq 1458 qubyr jelisine mindetti tehnıkalyq kýálandyrýlar men saraptamalar júrgizý kózdelip otyr. Sondaı-aq, ártúrli qondyrǵylarda 316 tonnadan astam katalızator almastyrylady.
«Eń kúrdeli ári negizgi operasııa – baıaý koksteý qondyrǵysynyń reaktorlaryndaǵy konýsty túpterdi aýystyrý. Bul úshin zaýyt aýmaǵynda júk kótergishtigi 750 tonna bolatyn eki biregeı kran ornatylyp jatyr. Reaktorlarda bolashaqta jabdyq senimdiligin arttyrý úshin ınnovasııalyq boljamdy dıagnostıka júıesi iske qosylady», dep habarlady kompanııanyń baspasóz qyzmeti.
Josparlanǵan aldyn alý jumysyn 1 880 maman atqarady. Jumysty sapaly atqarý úshin 62 arnaıy tehnıka tartylady.
«Osy kezeńde janar-jaǵarmaıdyń ishki naryqtaǵy turaqtylyǵyn saqtaý, munaı ónimderin jóneltýdi qamtamasyz etý úshin zaýyt jetkilikti kólemde taýarlyq ónim qoryn qalyptastyrý boıynsha barlyq qajetti sharalardy qabyldap jatyr», dep málim etti kompanııadan.
Jyl basynan bergi 8 aıda jeńil munaı ónimderi óndirisiniń úlesi 77,5% qurady. Al óńdeý tereńdigi – 88,6%. Dızel otynynyń (+15%) jáne avıaotynnyń (+13%) óndiris jospary artyǵymen oryndaldy. Sonyń nátıjesinde kásiporyn bıýdjetke 129 mlrd teńge aýdaryp, josparly kórsetkishten 24 mlrd teńgege artyq túsimdi qamtamasyz etti.
Sondaı-aq, zaýyttyń jyldyq óńdeý kólemin 6,1 mln tonnaǵa deıin arttyrý, jóndeýaralyq kezeńdi 36 aıǵa deıin uzartý kózdelip otyr.
