Bul jobanyń basty ereksheligi – árbir oqýshynyń sapaly bilim alýyna jaǵdaı jasap, ınklıýzıvti oqytýǵa aıryqsha kóńil bólýinde. Buǵan Astana qalasyndaǵy №116 jalpy orta bilim beretin jańa mektepke barǵanymyzda anyq kóz jetkizdik.
2025–2026 oqý jyly aıasynda ashylǵan eńseli de zamanaýı ǵımaratta qazir 2 877 oqýshy bilim alyp jatyr. Ár synypta 24 oqýshydan aspaıdy. Mektep dırektory Elmıra Ilııasovanyń aıtýynsha, bul bilim oshaǵynda erekshe balalarǵa da teń jaǵdaı jasalǵan.
«1-8 synyptar boıynsha 50 oqýshy erekshe bilim alýdy qajet etedi. Olarǵa pedagog-assıstent, logoped, psıholog, áleýmettik pedagog, defektolog mamandar kómektesedi. Muǵalimder elimizdiń ár óńirinen kelgen. Sondaı-aq úsh aýysymmen oqıtyn kórshiles mektepterden biraz oqýshy bizge aýysty. Balalar jańa mektepti jaqsy qabyldap jatyr. Mektep ınfraqurylymy da óte keń. STEM zerthanalary, IT-kabınetter, robottehnıka bólmeleri, bı jáne sport zaldary bar. Sondaı-aq hokkeı korty, qysqy alańdar jumys isteıdi. Barlyq úıirmeni tegin ashýdy josparlap otyrmyz», dedi ol.
Sonymen qatar mektep dırektory «Adal azamat» jobasynyń aıasynda alty baǵyt boıynsha jumys istep jatqandaryn atap ótti.
«Sonyń ishinde erekshe toqtalatynymyz – «Balalar kitaphanasy» jobasy. Bul joba úsh tilde júrgiziledi. Aldymen qazaq tilindegi kitap oqytylady, sodan keıin test tapsyrady. Keıin orys tilinde, odan soń aǵylshyn tilinde kórkem ádebıet usynylady. Barlyq úsh kezeńnen ótken soń oqýshylarmen suhbat júrgiziledi. Jeńimpazdar mamyr aıynda baǵaly syılyqtarmen marapattalady», dedi E. Ilııasova.
Al 7-synyp oqýshysy Dinmuhammed Dáýletkeldiulynyń aıtýynsha, mektepte erekshe balalarǵa jaqsy jaǵdaı jasalǵan.
«Bizdiń mektepte bir emes, tórt sport zal bar. Sonymen qatar munda jedelsaty, pandýstar, arnaıy belgiler ornatylǵan. О́zime hımııa páni erekshe unaıdy. Sebebi osyndaǵy zerthanada túrli tájirıbe jasaýǵa arnalǵan zamanaýı quraldar óte kóp», dedi ol.
Bul joba bilim berý júıesin jańǵyrtýda, oqýshylarǵa bilim alýdyń jańa formatyn usynyp, elimizdiń bolashaǵy úshin bilimdi, saýatty urpaq tárbıeleýge jol ashady. Jobanyń júzege asýy bilim berý salasyndaǵy ózgeristerdiń bastamasy jáne bolashaqta elimizdiń ekonomıkalyq, áleýmettik turǵyda damýyna áser etedi.
