Energetıka mınıstrliginiń habarlaýynsha, jańǵyrtý sharalary aıasynda turǵyndardyń ómir sapasyn jaqsartýǵa basymdyq berilip otyr. Bul úshin jańa elektr jelileri júrgizilip, eskileri qaıta qalpyna keltirilýde, eski jabdyqtar aýystyrylyp, zamanaýı tehnologııalar ornatylady.
Aıta keteıik, jobanyń negizgi operatory retinde «Qazaqstan kommýnaldyq júıeleri» kompanııalar toby men onyń enshiles uıymy «Ońtústik Jaryq Tranzıt» JShS belgilengen. Atalǵan uıymdar elektr energııasyn esepke alýdyń avtomattandyrylǵan júıesin engizip, sıfrlyq servısterdi damytyp, transformatorlyq qosalqy stansalar men jelilerdi jańǵyrtyp jatyr.
«Basty jobalar qatarynda – quny 3,8 mlrd teńge bolatyn Túrkistan qalasyndaǵy «Ortalyq – Iаssy» baǵytyndaǵy 110 kV elektr jelisiniń qurylysy bar. Joba 2026 jyldyń aqpan aıynda aıaqtalady dep josparlanǵan. Sonymen qatar, Ordabasy aýdanynda 110 kV elektr berý jelisi qaıta jańǵyrtylyp jatyr. Buǵan qosa, uzyndyǵy 89,8 shaqyrym bolatyn 31 nysandaǵy tómen voltty jeliler jańartylýda. Bul jumystarǵa 1,5 mlrd teńge ınvestısııa salynǵan. Sondaı-aq jańa býyndaǵy joǵary temperatýraǵa tózimdi ótkizgishter ornatylyp jatyr», delingen habarlamada.
Sonymen qatar «Ońtústik Jaryq Tranzıt» kompanııasy jeke ınvestısııalyq baǵdarlama aıasynda 5,3 mıllıard teńge qarjy baǵyttap otyr. Sonyń nátıjesinde 84 transformatorlyq qosalqy stansa jańartylyp, 240 shaqyrymnan astam elektr jelisi salynyp, qaıta jóndelgen. Qazirgi tańda Tórtkúl aýylyndaǵy qosalqy stansany jańartý men Sháýildir – Tórtkúl aralyǵynda 110 kV elektr jelisin salý jumystary jalǵasyp jatyr.
Aýqymdy ózgerister QR Energetıka mınıstrligi men Túrkistan oblysy ákimdiginiń qoldaýymen júzege asyp jatyr. Memlekettik organdar men jeke sektor arasyndaǵy seriktestik óńirdiń áleýmettik-ekonomıkalyq damýyna jańa serpin bermek.
