Foto: Ashyq derekkóz
Jıynǵa Qazaqstan saýda jelileri qaýymdastyǵy, oblys ákimderiniń orynbasarlary, sondaı-aq Magnum Cash&Carry, Small&Skif syndy saýda jelileriniń ókilderi de qatysty.
Arman Shaqqalıev Úkimet bekitken áleýmettik mańyzy bar taýarlarǵa 15% mólsherindegi saýda ústemesin saqtaý týraly sóz qozǵap, buzýshylyq bolǵan jaǵdaıda qatań sharalar qoldanylatynyn eskertti.
Jyl basynan beri Mınıstrliktiń aýmaqtyq departamentteri 2562 ákimshilik qaýly qabyldaǵan, onyń ishinde 1360-y – 56,5 mln teńgeden astam somaǵa aıyppul salynsa, 1202 kásipkerge eskertý jasalǵan. Al áleýmettik mańyzy bar azyq-túlik taýarlarynyń saýda ústemesin asyryp jibergeni úshin 2191 qaýly shyǵarylǵan, sonyń ishinde 1020-syna – 39,6 mln teńgege aıyppul salynǵan.
Et ónimderi naryǵynda belgilengen saýda ústemesiniń saqtalýyna erekshe nazar aýdarylyp otyr. Áleýmettik mańyzy bar sıyr etine ústeme baǵany asyrǵany úshin 45 qaýly rásimdelgen, onyń 33-i – aıyppul. Saýda mınıstrligi Aýyl sharýashylyǵy mınıstrligimen birlesip, et ónimderin saýda oryndaryna jetkizý kezinde ústeme baǵanyń saqtalýyn baqylaý úshin qosymsha monıtorıngtik toptar qurylyp jatqanyn habarlady. Sondaı-aq áleýmettik mańyzy bar azyq-túlik taýarlaryn ótkizýde jasyryn qymbattaý shemalaryn jáne retro-bonýstardy alyp tastaýǵa baǵyttalǵan zańnamalyq ózgerister daıyndalyp jatyr.
Aımaqtyq komıssııalardyń jumysy aıasynda jyl basynan beri 747 otyrys ótkizilip, 2301 buzýshylyq faktisi anyqtalǵan.1956 ákimshilik qaýly qabyldanyp, 345 naqty ónimi joq deldaldar alynyp tastalǵan. Elektrondy shot-faktýralardy taldaý barysynda 9015 myń taýarlyq tizbektiń ishinen 823 táýekeldi buzýshylyq belgili bolǵan.
Mınıstrlik elimizdegi iri saýda jelilerinde «Bereke Fest» aksııasy bastalatynyn da málimdedi. Aksııa aıasynda jańa ónimder, ásirese halyqtyń suranysyna ıe jańa pisken kókónister, jemister men sıyr eti usynylady. Saýda jelileri qazaqstandyq óndirýshiler úshin arnaıy oryndar bólip, ónimderdi naryqtan tómen baǵada satýǵa múmkindik beredi.
