Mýzeıdiń bas qor saqtaýshysy Lázzat Ertasovanyń aıtýynsha, baǵa jetpes jádigerlerdiń birazyn kezinde Gúlnar Mirjaqypqyzy ákep tapsyryp, amanattap ketken. Qundy jádigerlerdiń ishinde Mirjaqyptyń ult ustazy Ahmet Baıtursynulynyń 50 jyldyq mereıtoıyna arnap jazǵan orys tilindegi baıandamasynyń qoljazbasy, Alash arysynyń aıaýly jary Ǵaınıjamal Dosymbekovanyń tórkininen kelgen ydys-aıaǵy bar.
«Sonymen qatar Mirjaqyp Dýlatulynyń Orynbordaǵy úıinde turǵan kóne as ústeli de búginde mýzeı tórinde tur. Gúlnar apaı 1922–1928 jyldar aralyǵynda osy ústeldiń basynda otyrǵan, osy dastarqannan dám tatqan 200-den asa qazaq zııalysynyń tizimin bergen. Ol tizim, mine, qabyrǵada ilýli tur. Bul tizimnen Alashtyń nebir jaqsy-jaısańdary osy ústeldiń basynda otyryp el taǵdyry jaıynda syr shertkenin ańǵaramyz. Odan qaldy, Mirjaqyp Dýlatulynyń ózi ustaǵan jol sómkesi, kitap týmbasy, balalarynyń shashyn alatyn arnaıy máshińkesi, Ǵaınıjamaldyń qobdıshalary, atlas kórpesi, Zulqaınar esimdi aǵaıyn inisine arnap jasalǵan Alashtyń qupııa belgisi, Solovesk lagerinde Mirjaqyptyń qyzyna jasap bergen fotoramasy, ózi tikken, aıaqtalmaı qalǵan taqııasy, Mirjaqyptyń uly Álibektiń qaıystan jasalǵan, kúmistep áshekeılengen kise belbeýi saqtaýly tur», deıdi qor saqtaýshy.
Mýzeı qoryndaǵy qundy jádigerler qatarynda Mirjaqyp ómiriniń ár kezeńinen syr shertetin fotoqujattar da barshylyq. Olardyń ishinde Mirjaqyptyń otbasymen birge túsken sýretter, Solovesk lagerinde túsken fotosýret, Alash arystarynyń ortasynda turǵan fotoqujattar kózge ystyq kórinedi.
Qostanaı oblysy
